Aǵymdaǵy jyldyń úsh aiynda Aqmola oblysynda ana óliminiń úsh jaǵdaiy tirkeldi. Bul týraly brifingte Aqmola oblysy Densaýlyq saqtaý basqarmasy basshysynyń mindetin atqarýshy Nariman Syzdyqov aitty, dep habarlaidy "Ult aqparat".
«Ókinishke orai, óńirde ana ólimi bar. Búgingi kúni-eki ana ólimi koronavirýspen bailanysty, qazir ana óliminiń taǵy bir jaǵdaiy №2 MOB-da tergelýde. Eger ótken jyly pandemiiaǵa qaramastan bizde ana óliminiń úsh jaǵdaiy ǵana bolsa, biyl tolyq emes úsh aida eki jaǵdai tirkeldi, buǵan qosa taǵy bireýi tekserilip jatyr», - dedi N. Syzdyqov.
Ótken jyldyń 12 aiynda Aqmola oblysynda ana óliminiń úsh jaǵdaiy tirkeldi: eki jaǵdai - Kókshetaý qalasynyń №1 emhanasynda, bir jaǵdai – «Avitsenna-Býrabai» JShS-de. Olardyń ishinde eki jaǵdai COVID-19 jáne bir jaǵdai akýsherlik patologiiamen - eklampsiiamen bailanysty boldy. 2019 jyly aimaqta ana óliminiń eki jaǵdaiy bolǵan. Onyń bireýi ekstragenitaldy aýrýdan, ekinshisi akýsherlik patologiiadan - bosanǵannan keiingi qan ketýden.
Basqarma basshysynyń aitýynsha, óńirde 2020 jyly koronavirýs juqtyrǵan 201 júkti Densaýlyǵynda aqaýlyq bar júkti áielderge kúndelikti monitoring jáne bosanǵanǵa deiin olardyń baǵytyn baqylaý júrgiziledi. Qazirgi ýaqytta júkti áielder tirkeliminiń derekteri boiynsha aýyr ekstragenitaldy aýrýlary jáne júktilikke qarsy kórsetilimderi bar 23 júkti áiel esepte tur. Jasóspirimder arasyndaǵy júktiliktiń jiiligi 3,5 quraidy (14 731 jasóspirim qyzǵa 51 jaǵdai).
«Ana óliminiń negizgi sebebi jańa belgisiz infektsiiamen - COVID-19, meditsinalyq kómekti uiymdastyrý tarapynan kemshiliktermen bailanysty: statsionar deńgeiindegi jaǵdaidy jete baǵalamaý, bastapqy kezeńde álsiz uiymdastyrýshylyq, pandemiiaǵa bailanysty meditsinalyq kómekke qoljetimdiliktiń tómendeýi», - dep tolyqtyrdy basqarma basshysy.
