Aqmola oblysy advokattar alqasynyń advokaty memleket kepildik bergen zań kómegin kórsetý kezinde jumsalǵan ýaqyt týraly kórineý jalǵan málimetterdi engizip, tergeýshiniń atynan 10 mln. teńgege jýyq somaǵa 15 jalǵan qaýly daiyndaǵan. Bul týraly Ádilet ministrliginiń baspasóz qyzmeti habarlady.
QR Ádilet ministrligi qylmystyq quqyq buzýshylyqtar boiynsha advokat kórsetetin memleket kepildik bergen zań kómegin biýdjet qarajaty esebinen tóleý týraly qaýlylarǵa taldaý júrgizdi.
Joǵaryda atalǵan is-áreketterdiń saldarynan Aqmola oblysynyń advokaty 9,6 mln. teńgeden astam aqsha qarajatyn zańsyz alǵany anyqtaldy.
Sot úkimimen advokat QR QK 190-babynyń 3-bóligi 1) tarmaǵy, 385-babynyń 1-bóliginde kózdelgen qylmystardy jasaǵany úshin kináli dep tanyldy.
Sot 3,5 jylǵa bas bostandyǵyn shekteý jazasyn taǵaiyndady.
Sondai-aq, QR QK 50-babynyń 3-bóligi negizinde advokat bes jyl merzimge advokattyq qyzmetpen jáne zań qyzmetterin kórsetý jónindegi qyzmetpen ainalysý quqyǵynan aiyryldy.
Úkim zańdy kúshine endi jáne Ádilet ministrligi advokatqa advokattyq qyzmetpen ainalysýǵa berilgen litsenziianyń qoldanysyn toqtatty.
Sotqa deiingi tergeý barysynda advokat jymqyrǵan aqsha biýdjetke qaitaryldy.
Ministrlik osyndai faktilerdi anyqtaý jáne olarǵa jol bermeý jónindegi turaqty negizde jumys júrgizýde.
«Budan basqa, 2021 jylǵy sáýirden bastap elimizdiń búkil aýmaǵynda memleket kepildik bergen zań kómegine bólinetin biýdjet qarajatyn jumsaýdyń ashyqtyǵy men tiimdiligin qamtamasyz etetin «E-zań kómegi» aqparattyq júiesi jumys isteidi»,-delingen habarlamada.
