Aqmola oblysynyń Qorǵaljyn aýylyna kiik kirip ketti. Bul týraly áleýmettik jelide beinejazba tarady, dep habarlaidy "Ult aqparat".
Beinejazbadaǵy kýágerlerdiń aitýynsha, oqiǵa jaqynda Qorǵaljyn aýylynda bolǵan. Jazbadan kiik tekesiniń aýyl kóshesinde júrgenin kórýge bolady.
Ol tipti, adamdar men kólikten de qoryqpaidy. Turǵyndar aýyl ishinde «kútpegen qonaqty» videoǵa túsirip, taratyp jatyr.
Aýyl turǵyndary bul jalǵyz kiik emes, birnesheýi keldi dep otyr.
Turǵyndardyń aitýynsha, en dalada adamnyń kózine túse bermeitin kiikter boranda qalyń qarda júre almai, ashyqqannan aýylǵa kelgen.
Sol sebepti turǵyndar jabaiy ańdarǵa jemshóp berýde.
Eske sala keteiik, Aqmola oblysynda kiikterdiń qyrylýy qaýpi tóngen bolatyn.
Aqmola oblys boiynsha orman sharýashylyǵy jáne janýarlar álemi aýmaqtyq inspektsiiasynyń málimetinshe, 2020 jyldyń jeltoqsan aiynda Qorǵaljyn memlekettik tabiǵi qoryǵynda 25 myń kiik sanaldy.
Qys ailarynda aýa raiynyń kúrt buzylýy óńirde qystap qalǵan kiikterge qaýip tóndirgen bolatyn.
