Aqmola oblysynda aǵasy baýyrynyń ornyna UBT tapsyrýǵa tyrysqan, dep habarlaidy "Ult aqparat" Aqmola oblysy boiynsha Sybailas jemqorlyqqa qarsy is-qimyl departamentiniń baspasóz qyzmetine silteme jasap.
Vedomstvonyń málimetinshe, 18-20 tamyz aralyǵynda Sh. Ýálihanov atyndaǵy Kókshetaý memlekettik ýniversitetiniń bazasynda Ulttyq biryńǵai testileý ótti. Aqmola oblysynda 531 túlek testileýge qatysýǵa ótinish berdi, onyń ishinde 440 túlek qatysqan.
Aita keteiik, joǵary bilim alýdyń qoljetimdiligin arttyrý maqsatynda JOO-ǵa aqyly negizde túsý úshin túlekter testileýdi jylyna 4 ret tapsyra alady. UBT-nyń ashyqtyǵy men obektivtiligin qoǵamdyq baqylaý úshin Bilim jáne ǵylym ministrliginiń buiryǵynyń negizinde jumys tobyna baiqaýshy retinde «Adaldyq alańy» jobalyq keńsesiniń ókilderi kirdi.
Monitoring barysynda 9 talapker UBT-ǵa jiberilmedi, taǵy úsheýi aýditoriiadan shyǵaryldy. Mundaǵy basty sebep – talapkerler tyiym salynǵan zattardy alyp ótýge jáne qoldanýǵa tyrysqan, UBT ótkizý erejelerin buzǵan.
«Talapkerlerdi testileýge jiberý kezinde biz bóten tulǵany da anyqtadyq. Testileýden óter aldynda túlekterdiń qolynda ruqsat qaǵazy jáne sáikestendirý úshin jeke kýáligi bolýy tiis. Alaida, mektep túlegi retinde kóringen jas jigit eki jeke kýálikpen keldi. Keiinirek belgili bolǵandai, ol inisiniń ornyna test tapsyrýǵa tyrysty. Osy fakti boiynsha tiisti akt jasaldy», - dep atap ótti «Aqmola - adaldyq alańy» jobalyq keńsesiniń jetekshisi, jumys tobynyń múshesi Samira Taitenova.
Aqmola oblysy boiynsha Sybailas jemqorlyqqa qarsy is-qimyl departamenti oqýshylardy tek óz bilimine ǵana súiene otyryp, test tapsyrýǵa shaqyrady. Al ata-analarǵa testileý qorytyndysy boiynsha oń baǵa alý maqsatynda para bergeni úshin qylmystyq jaýapkershilik jáne bas bostandyǵynan aiyrý jazasy bar ekenin eskertedi.
Eger azamattar osyndai jaǵdaiǵa tap bolsa, 1424 Call-ortalyǵyna qońyraý shalýy tiis.
