Ákimdikter jaiylym jerlerdi memleket qajetine ala alady. Bul týraly búgin QR Aýyl sharýashylyǵy vitse-ministri Rústem Qurmanov aitty, dep habarlaidy QazAqparat.
«Qazirgi ýaqytta turǵyndardyń malyn jaiýǵa jaiylym jerlerdiń jetispeýshiligi problemasy bar. Aita keterligi, eldi mekenderdiń mańyndaǵy jerlerdiń basym bóligi ekinshi deńgeili bankterdiń jáne olardyń qarjylyq uiymdarynyń kepilinde tur. Al bul jait jergilikti atqarýshy organdarǵa memleket qajettiligi úshin jerdi alyp qoiý is-sharalaryn qabyldaýǵa múmkindik bermei otyr. Osy oraida «kepilge qoiylǵan jerlerdi alý boiynsha qandai is-sharalar qoldanylady, qoldanystaǵy zańnamada kepilge qoiylǵan jerdi alý tetikteri bar ma?» degen zańdy saýaldar týyndaidy», - dedi Májilis depýtaty Asqarbek Úisimbaev «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasy jónindegi jumys tobynyń otyrysynda.
Osy máselege qatysty pikir bildirgen QR Aýyl sharýashylyǵy vitse-ministri Rústem Qurmanov eldi mekenderdiń tóńiregindegi jaiylym jerlerge qatysty máseleniń ótkir turǵanyn jasyrǵan joq.
«Ásirese ońtústik óńirlerde másele ótkir tur. Taiaýda ǵana saraptama júrgizip, ońtústik óńirlerde jaiylymdardyń júktemesi normativten 2 ese joǵary ekendigin anyqtadyq. Soǵan orai qoldanystaǵy jer kodeksinde ákimdikterdiń memleket qajettiligi úshin jaiylym jerlerdi alýy kózdelgen norma qarastyrylǵan. Bul neni bildiredi? Ákimdikter eldi meken tóńiregindegi jerdi paidalanýshylardan sol jerdi alýyna nemese eldi mekennen shalǵaidaǵy dál sondai jerdi berýine, ýchaskeniń qunyn óteý arqyly satyp alýyna múmkindik beredi. Tipti, halyqtyń qajetin qanaǵattandyrý úshin eldi mekenderdiń mańyndaǵy jerlerdi ákimdikterdiń qaitaryp alǵany jaily da derekter bar. Iaǵni, mundai tájiribe bolǵanymen belsendi túrde qoldanylmaidy. Ákimderdiń barlyǵy osy jolmen júrip otyrǵan joq», - dedi Rústem Qurmanov.
