Atyraý oblystyq ákimdiginiń qyzmetkerleri qaitys bolǵan politsei Shalqar Aqymǵalievtiń otbasyna bir kúndik eńbekaqysyn aýdarady.
Búgin Atyraý qalasynyń ákimi Alimuhammed Quttumuratuly marqumnyń áriptesi politsiia kishi leitenanty Rústembek Súndetovpen kezdesti. Ol 21 naýryz kúni keshkisin kópirden sekirgen áieldi qutqaryp qalǵan bolatyn. Ókinishke qarai, sol túni qasynda bolǵan áriptesi Shalqar Aqymǵalievtiń ǵumyry úzildi. Rústembek joldasynyń denesin ózennen ózi alyp shyqqysy kelip, kóp izdegenimen taba almady. 3 gradýstan aspaityn temperatýradaǵy sýyq sýdan 30 jastaǵy kishi leitenant Súndetov jaǵalaýǵa aman shyqty. Rústembek úilengen, eki balanyń ákesi.
«Búginde qoǵamda politsiiaǵa qatysty qalyptasyp qalǵan teris stereotip bar. Quqyq qorǵaý organdary qyzmetkerleri týraly syndy jii estimiz. Sizder, ómirden ótken Shalqar Aqymǵaliev ekeýińiz qazaqstandyq politsiia týraly sondai túsinikterdi teriske shyǵardyńyzdar. Óskeleń urpaqqa úlgi boldyńyzdar, ata-ananyń tárbieli uly ekendikterińizdi kórsettińizder, sizderdi barsha el maqtan etedi», - dedi Alimuhammed Quttumuratuly.
Atyraý qalasynyń ákimi Rústembek Súndetovke qurmet gramotasyn tabystap, batyl áreketi úshin alǵys bildirdi.
Eske salsaq, 22 naýryzda Atyraý oblysynyń turǵyndary erlikpen qaza tapqan politsiia qyzmetkeri Shalqar Aqymǵalievti bir minýt únsizdikpen eske alyp, rýhyna taǵzym etken bolatyn. Batyrdy sońǵy saparyna shyǵaryp salý rásimine júzdegen azamat jinaldy. Sondai-aq, aimaq basshylyǵy men oblystyq politsiia departamenti politseidiń jerleý rásimine bailanysty shyǵyndardy kóterdi.
