QR Premer-Ministri Asqar Maminniń tóraǵalyǵymen ótken Úkimet otyrysynda Indýstriialyq-innovatsiialyq damýdyń 2020-2025 jyldarǵa arnalǵan memlekettik baǵdarlamasy aiasynda Indýstriialandyrý kartasy jobalaryn iske asyrý barysy qaraldy, dep habarlaidy primeminister.kz saity.
QR indýstriia jáne infraqurylymdyq damý ministri B. Atamqulov, Qaraǵandy oblysynyń ákimi J. Qasymbek, Pavlodar oblysynyń ákimi Á. Sqaqov, Qostanai oblysynyń ákimi A. Muhambetov baiandama jasady.
Pandemiianyń kúrdeli jaǵdailary men ekonomikadaǵy álemdik quldyraýǵa qaramastan, 2020 jyldyń 8 aiynda óńdeý ónerkásibinde oń dinamika qalyptasty, ósim 3,3%-dy qurady. Biyl Indýstriialandyrý kartasy aiasynda jalpy somasy 996 mlrd teńgege 206 jobany iske qosý kózdelgen. Bul óndiris kólemin 1,3 trln teńgege, eksportty 325 mlrd teńgege arttyrýǵa, shamamen 19 myń jańa jumys ornyn qurýǵa múmkindik beredi.
Salalar bólinisinde jobalardyń negizgi bóligi mashina jasaý (170 mlrd teńgege 19 joba), TKMK (190 mlrd teńgege 18 joba), AÓK (195 mlrd teńgege 76 joba), energetikaǵa (126 mlrd teńgege 10 joba) tiesili. Indýstriialandyrýdyń kórneki mysaldary — Almatyda «Hyundai» jáne Qostanaida «Chevrolet» jeńil avtomobilderin qurastyrýdy iske qosý, Qaraǵandy oblysynda tehnikalyq gazdar óndirisi men altyn shyǵarý fabrikasyn ashý jáne t. b.
Qurylatyn Ónerkásipti damytý qory 3%-dan aspaityn mólsherleme boiynsha qoljetimdi nesie berý arqyly kásiporyndardy keńeitýge jáne jańǵyrtýǵa yqpal etedi.
Biyl kapitaldy asa qajet etetin jobalar Qaraǵandy, Aqtóbe, Almaty, Jambyl, Pavlodar oblystarynda jáne Almaty qalasynda iske asyrylýda.
«Qalǵan óńirler jobalardy iske asyrýdy jandandyrsyn. Ákimder Indýstriialandyrý kartasyndaǵy jobalar boiynsha jeke jaýapty bolady», — dedi A. Mamin.
Úkimet basshysy Indýstriia jáne infraqurylymdyq damý ministrligine memlekettik organdarmen jáne ákimdiktermen birlesip, biylǵy jylǵa belgilengen barlyq jobalardy iske asyryp qana qoimai, Indýstriialandyrý kartasy jobalarynyń pýlyn qosymsha pysyqtap, keńeitýdi tapsyrdy. Sonymen qatar barynsha turaqty ishki jáne syrtqy suranysy bar salalardy, onyń ishinde jeńil, azyq-túlik jáne himiia ónerkásibin, mashina jasaý men farmatsevtikany, keń aýqymdy paidalanylatyn qurylys materialdaryn óndirýdi qoldaýǵa, sondai-aq munai-himiia jáne gaz óńdeý salalaryndaǵy tehnologiialyq kúrdeli jobalardy qoldaýǵa bar kúsh-jigerdi jumsaý qajet.
Premer-Ministr monoqalalarda indýstriialyq jobalardy damytý qajet ekenin atap ótti. Tabysty mysal retinde Qaraǵandy oblysynyń Saran qalasyn keltirdi, onda «Youtong» avtobýstar men arnaiy tehnika óndirisi boiynsha iri jobany iske asyrý qolǵa alyndy. 1 500 jumys orny qurylady, avtobýstar men arnaiy tehnika óndirisiniń qýattylyǵy jylyna 1 500 birlikti quraidy. Sonymen qatar qýattylyǵy jylyna 3,5 mln deiin bolatyn avtoshinalar óndirý jobasy pysyqtalyp jatyr, olardyń 30%-yn eksporttaý josparlanǵan. Bul taǵy 1,5 myń jumys orny. Jalpy alǵanda, Saran qalasynda investitsiialar kólemi 150 mlrd teńgeni, jyl saiynǵy ónim shyǵarý 160 mlrd teńgeni quraidy. Buǵan qosa áleýmettik-injenerlik infraqurylymdy qalpyna keltirý jáne salý jumystary bastaldy.
«Mundai deńgeidegi óndiristi barlyq monoqalalarda damytý qajet. Sondyqtan ákimder investorlarmen belsendi jumys istep, olar úshin qajetti jaǵdailardy jasap, halyqty jumys oryndarymen qamtamasyz etýi kerek», — dedi A. Mamin.
Úkimet basshysy Indýstriia jáne infraqurylymdyq damý ministrligine «tsifrlyq dáýir» ónerkásibin damytý jónindegi jumysty kúsheitýdi jáne tsifrlyq sheshimderdi engizetin kásiporyndardy qosymsha yntalandyrý múmkindigin pysyqtaýdy, Tsifrlyq damý, innovatsiialar jáne aeroǵarysh ónerkásibi ministrligine óndiristik protsesterge robottandyrý men jasandy zerde ozyq tehnologiialaryn engizý deńgeiine monitoringti kúsheitýdi tapsyrdy. Indýstriia jáne infraqurylymdyq damý ministrligine 2020 jylǵy qazan aiynyń sońyna deiin «Ónerkásiptik saiasat týraly» zań tujyrymdamasynyń jobasyn ázirlep, Úkimetke engizý tapsyryldy.
