Shyǵys Qazaqstan oblysynda aýyl ákimderin sailaýǵa qatysý joǵary deńgeide bolady dep kútilýde, dep habarlaidy QazAqparat.
Shyǵys Qazaqstanda búginde 77 aýyl ákimin sailaý úshin 221 sailaý ýchaskesi ashylǵan. Alǵashqy sailaýshylar arnaiy ýchaskelerge baryp, óz kandidattaryna daýys berdi. Olardyń keibireýleri sailaý kúniniń mańyzdylyǵy týraly oilarymen bólisti.
«Búgin bárimiz úshin óte mańyzdy kún, sebebi biz aýyl basshysyn tańdap jatyrmyz. Bul bizdiń Vydriha aýylynyń tynys-tirshiligin biletin, týyndaityn barlyq qiyndyqtardy, sonyń ishinde sýmen jabdyqtaý, sý tasqynyna qarsy kúres jáne taǵy basqa mańyzdy máselelerdi sheshetin adam bolýy tiis. Bolashaq ákim kóp nárseni júzege asyrýy kerek, oǵan aýyl turǵyndary kómektesetin bolady. Laiyqty adamdy tańdap, onymen birge aýyldyń igiligi úshin tórt jyl birge turyp, eńbek etemiz», – dedi Shemonaiha aýdany Vydriha aýylynyń turǵyny Aleksandr Belkin.
Úrjar aýdany Maqanshy aýylynyń turǵyny Jumaǵazy Jaqanbaev aýyl ákimderin sailaý – elimizdiń alǵa úlken qadam jasaýyna múmkindik beretin mańyzdy oqiǵa ekenin atap ótti.
«Búkil Qazaqstan úshin búgin erekshe kún. Halyq búginde bolashaq ákimge úlken úmit artyp otyr. Ol keiin aýyldyń órkendeýi úshin aianbai eńbek etedi dep senemiz. Sailaý halyqqa úlken paida ákeledi dep oilaimyn. Men óz tańdaýymdy jasadym», - dedi ol.
«100 jańa esim» jobasynyń jeńimpazy Serikjan Qajytai sailaý ýchaskesine kelip, Úrjar aýyldyq okrýginiń bolashaq ákimine daýys berdi.
«Sailaý jaqsy ótýde. Sailaýshylar joǵary belsendilik tanytyp jatyr. Barlyq sanitarlyq talaptar qatań saqtalýda. Jerlesterimdi jarqyn bolashaq úshin óz tańdaýlaryn jasaýǵa shaqyramyn», - dedi ol.
Besqaraǵai aýdany Steklianka aýylyndaǵy sailaý ýchaskesinde birinshi bolyp daýys bergen Qurmanbek Bekeev boldy. Ol QR Prezidenti Qasym-Jomart Toqaevtyń aýyl ákimderin sailaýyn ótkizý týraly bastamasy jergilikti ózin-ózi basqarý júiesine qatysty azamattardyń dúnietanymyn túbegeili ózgertetinin jetkizdi.
«Aýyl turǵyndary endi barlyq qoiylǵan mindetterdi sapaly oryndaityn ákimdi óz betinshe tańdai alady. Búgin men de óz tańdaýymdy jasadym», - dedi Qurmanbek Bekeev.
