«Partiialyq emes baqylaý ortalyǵy» respýblikalyq qoǵamdyq birlestiginiń Shyǵys Qazaqstan oblysyndaǵy filialynyń tóraǵasy Aiaýjan Áshimova erteńgi sailaýǵa 300-den astam beitarap baiqaýshy daiyndaǵandaryn aitady, dep habarlaidy QazAqparat.
«Búginge deiin 300-den astam baqylaýshyny oqytyp, erteńgi naýqandy baiqaýǵa daiyndap otyrmyz. Erteń ákimder sailaýynda óńirdegi barlyq sailaý ýchaskesinde bizdiń beitarap baiqaýshylar jumys isteidi. Maqsatymyz – sailaýdyń ádil, ashyq ótýin qadaǵalaý. Baiqaýshylardy burynnan daiyndap júrgendikten, bul joly zań normalarymen tanystyryp qana qoimai, burynǵy tájiribemiz boiynsha shtattan tys jaǵdailardy aityp, túrli keisterdi keltirip, ondai jaǵdailarda ózi qalai ustaý kerektigin úirettik», - deidi beitarap baiqaýshylardyń ókili.
Aiaýjan Áshimov sákim sailaýyn baiqaýshylardy iriktegen kezde eń birinshi nietiniń durystyǵyna kóńil bólingenin aitady.
«Ekinshiden, baiqaýshylardy neǵurlym jergilikti turǵyndar arasynan tarttyq. Olar búgin baiqaýshy bolǵanymen, erteń sol aýylda qarapaiym turǵyn retinde ómir súredi. Sondyqtan sailaýdyń burmalaýsyz ótýine múddeli bolady», - deidi «Partiialyq emes baqylaý ortalyǵynyń» ókili.
Erteń Shyǵys Qazaqstanda jalpy jiyny 77 eldi mekenniń ákimi sailaý arqyly anyqtalady.
«Baiqaýshylardyń bári óte belsendi. Osy protseske úlken qyzyǵýshylyqpen aralasyp otyr. Olardyń jas quramy da árkelki. Árine jastardyń qatary kóbirek. Biraq biz baiqaýshylardy sailaý ótetin aýyldardyń ózinen jasaqtaǵanymyzdy aitý kerek. Demek, arasynda atalar men ájeler de bar», - dedi Aiaýjan Áshimova.
