Qaraǵandy oblysynyń ákimi Jeńis Qasymbek "ArselorMittal Temirtaý" tsehyndaǵy tórt jumysshysynyń qazasy týraly aityp, oqiǵany Abai kenishindegi qaiǵyly oqiǵamen salystyrdy, - dep habarlaidy Tengrinews.kz.
"Naqtyraq oqiǵaǵa qatysty. Aldyn ala aita alamyn, byltyr Ónerkásiptik qaýipsizdik departamenti bul ǵimaratqa tekserý júrgizdi. Ony jumys maqsatynda paidalanbaý týraly uiǵarym bar edi. Barlyq qaýipsizdik erejelerin (QE -esk.) saqtai otyryp, jóndeý jumystaryn júrgizý kerek bolatyn.
"ArselorMittal Temirtaý" kompaniiasynyń enshiles kásiporny "Qurylysmet" kompaniiasy júrgizgen jóndeý jumystary osyndai qaiǵyly jaǵdaiǵa ákeldi. Búginde onyń sapasy men qaýipsizdik talaptaryna sáikestigi tekserilip jatyr. Arselordyń eki qyzmetkeri, sonyń ishinde osy enshiles kompaniianyń basshysy qamaýǵa alyndy. Bul másele boiynsha biz eki apta nemese ai saiyn brifing ótkizip, ózekti aqparat berýge daiynbyz", - dedi Qasymbek Ortalyq kommýnikatsiialar qyzmetindegi brifingte.
Ol kásiporyndaǵy ónerkásiptik qaýipsizdikti qamtamasyz etýde problema baryn moiyndady.
"Abai kenishindegi byltyrǵy qaiǵyly oqiǵa esimizde. Árine, tabiǵi jáne tehnogendik máseleler boldy, biraq qaýipsizdik erejelerin saqtaýǵa qatysty máseleler de boldy. Memlekettik organdar bul máselelerdi únemi baqylaýda ustaidy, biraq zaýyttyń 60 jyldan astam ýaqyt buryn salynǵanyn moiyndaý kerek, kóp qondyrǵylar men aktivter múmkindiginshe, tezirek qosymsha jóndeýdi qajet etedi", - dedi Qasymbek.
