Búgin Almatyda «Sońǵy úkim» filminiń túsirilimi bastaldy, dep habarlaidy QazAqparat.
Kartina QR Mádeniet jáne sport ministrliginiń tapsyrysy boiynsha Ulttyq kinony qoldaý memlekettik ortalyǵynyń qoldaýymen shyǵarylýda.
Film qazaqtyń kórnekti aǵartýshysy, qoǵam qairatkeri jáne saiasi pýblitsist Ahmet Baitursynovtyń 150 jyldyǵyna arnalǵan.
Túsirilim tobyn Erlan Nurmuhambetov pen Ergen Toqmýrzin basqarady. Nurmuhambetov - «Jańǵaq aǵashy» filmi úshin Pýsan halyqaralyq kinofestivali (Ońtústik Koreia) «Jańa aǵymdar» sektsiiasynyń gran-pri iegeri. Rejisserdiń «Ýaqyt joldary» atty sońǵy kartinasy osy jyly Frantsiiada prokatqa shyqty. Onyń seriktesi Ergen Toqmýrzin kóptegen derekti filmderdiń qoiýshy rejisseri bolǵan.
Kartinanyń siýjeti Ahmet Baitursynovtyń ómiriniń barlyq kezeńderin qamtidy.
Basty rólde – Qazaqstannyń eńbek sińirgen qairatkeri Azamat Satybaldy.
«Bul - ult ustazy Ahmet Baitursynov týraly film. Onyń ómiri, qoǵamdaǵy isteri jáne eń bastysy, onyń kúresi týraly. Bul - memlekettiń arnaiy tapsyrysymen túsirilip jatqan úlken joba. Baitursynov – bizdiń maqtanyshymyz. Meniń oiymsha, bizdiń jas urpaq osyndai filmderdi kórýi tiis. Óitkeni, Ahmet aǵanyń jasaǵan isteri, Alash Orda qairatkerleriniń erligi – búgin kezdespeitin batyldyq. Sondyqtan sol kezdegi oqiǵalardy zamanaýi kórermenge kórsetý kerek», - deidi akter Azamat Satybaldy túsirilim alańynda bizge bergen suhbatynda.
Sondai-aq, kartinaǵa Nazgúl Qarabalina, Aleksandr Bagriantsev jáne Erlan Káribaev túsýde.
Túsirilimniń negizgi lokatsiialary – Almaty qalasy jáne Shyǵys Qazaqstan oblysy. Qoiýshy operator – Mars Omarov. Bas prodiýser – Dastan Atyǵaev. Stsenarii avtory – Ǵalym Dosken. Jyl sońyna deiin avtorlar 14 aýysymdy túsirýdi josparlap otyr. Filmniń negizgi bóligi kelesi jyly túsiriledi.
