«Aq jol» partiiasynyń músheleri «Ashat Aimaǵambetovke nelikten shabýyl jasap jatyrsyzdar?» degen syńaidaǵy qoǵamda týyndaǵan pikirge jaýap berdi, dep habarlaidy QazAqparat.
«Daniia Espaevanyń depýtattyq saýaly qoǵamda kóp talqylandy. Kóbisi bul «Ashat Aimaǵambetovke jasalǵan shabýyl»dep aityp jatyr. Osyǵan bailanysty partiia músheleri ne aitar eken?» - dep suraq qoidy búgin Ortalyq kommýnikatsiialar qyzmetinde ótken baspasóz máslihatynda tilshilerdiń biri partiia múshelerine.
Bul suraqqa jaýap bergen Berik Dúisembinov «bul – Ashat Aimaǵambetovke jeke azamat retinde emes, ministr retinde qoiylǵan suraq» ekenin jetkizdi.
«Ashat Aimaǵambetovti búgingi tańdaǵy qazaqtildi ultjandy azamattardyń biri dep asa qurmetpen qaraimyz. Ol azamat ministrdiń orynbasary bolǵan kezde talai suraqtarymyzǵa tikelei jaýap bergen. Qarym-qatynasymyz óte jaqsy. Sondyqtan áleýmettik jelige tarap ketken «shabýyl» degen áńgime múlde teris ekenin aitqym keledi», - dedi ol.
Berik Dúisembinov «Aq jol» partiiasy Bilim jáne ǵylym ministrliginen daýlap otyrǵan qarajatqa qatysty aita kele ol aqsha túsken kezde Ashat Aimaǵambetovtiń ministr bolmaǵanyn aityp ótti.
«Sondyqtan bul Ashat Aimaǵambetovtiń jeke basyna emes, ministrlikke qoiylǵan suraq ekeni eskerilse deimiz», - dedi ol.
Eske sala ketsek, buǵan deiin Parlament Májilisiniń jalpy otyrysynda «Aq jol» fraktsiiasynyń depýtaty Daniia Espaeva bilim berý salasyndaǵy ózekti máselelerge qatysty Úkimet basshysy Asqar Maminniń atyna depýtattyq saýal joldaǵan bolatyn.
D. Espaeva 29 shildede Bilim jáne ǵylym ministri Ashat Aimaǵambetovtiń atyna tiisti hat joldanǵanyn, onda 67 mln dollar kólemindegi halyqaralyq zaimǵa qatysty saýaldar qoiylǵanyn atap ótti. Sondai-aq 2016 jyldan bastap (27,2 mlrd teńge) mektepter úshin jergilikti bilim basqarmalaryna bólingen qarjynyń igerilýine bailanysty suraqtar baǵyttalǵan. Onyń aitýynsha, zańnama aiasynda memlekettik organ sýaldarǵa bir ai ishinde jaýap berýi tiis. Alaida áli kúnge deiin vedomstvodan jaýap kelmegen.
