Májiliste «Qazaqstan Respýblikasynyń jańa Konstitýtsiiasyn qabyldaýǵa bailanysty raqymshylyq jasaý týraly» zań jobasy birinshi oqylymda tanystyryldy. Qujat Memleket basshysynyń biyl 17 naýryzda jariialaǵan bastamasyn iske asyrýǵa baǵyttalǵan, dep habarlaidy Ult.kz.
Zań jobasyn tanystyrǵan depýtat Abzal Quspannyń aitýynsha, bul jolǵy raqymshylyqtyń ereksheligi – Qazaqstanda alǵash ret qylmystyq jáne ákimshilik raqymshylyq qatar júrgiziledi.
Qujatqa sáikes, qylmystyq teris qylyqtar, aýyrlyǵy az qylmystar, sondai-aq keltirilgen zalaly tolyq ótelgen ortasha aýyr qylmystar boiynsha qylmystyq ister toqtatylýy múmkin. Sondai-aq osy sanattaǵy qylmystar úshin sottalǵan azamattardy jazadan bosatý jáne ortasha aýyr, aýyr jáne asa aýyr qylmystar boiynsha sottalǵandardyń jazasynyń ótelmegen bóligin qysqartý usynylyp otyr.
Sonymen birge raqymshylyq sybailas jemqorlyq, terrorizm, ekstremizm, kámeletke tolmaǵandarǵa qarsy jynystyq qylmystar, azaptaý, qaitalanǵan aýyr qylmystar jáne basqa da qoǵamdyq qaýipti áreketter jasaǵandarǵa qoldanylmaidy.
Zań jobasy ákimshilik quqyq buzýshylyqtar úshin salynǵan aiyppuldardy da keshirýdi kózdeidi. Atap aitqanda, jeke tulǵalar, jeke kásipkerler, notariýstar, jeke sot oryndaýshylary, advokattar men zań konsýltanttary ákimshilik aiyppuldan bosatylýy múmkin. Alaida bul jeńildik sottar taǵaiyndaǵan aiyppuldarǵa jáne qoǵamdyq qaýipsizdikke qater tóndiretin quqyq buzýshylyqtarǵa qatysty qoldanylmaidy.
Depýtattyń málimetinshe, raqymshylyq jasaý týraly túpkilikti sheshimdi ár sottalǵan adamǵa qatysty sot jeke qaraidy.
Sondai-aq zań jobasynda bas bostandyǵynan aiyrý oryndarynan bosatylatyn azamattardy qoǵamǵa beiimdeý jáne qaita áleýmettendirý mindeti jergilikti atqarýshy organdarǵa júkteledi.
Zań qabyldanǵan jaǵdaida, ol qosymsha biýdjet shyǵyndaryn talap etpeidi jáne áleýmettik-ekonomikalyq teris saldarǵa ákelmeidi dep kútilýde.
