Elordada Prezidenttik kadrlyq rezervtegi jastar birqatar ministrmen kezdesý ótkizýde, dep habarlaidy QazAqparat.
Naqtyraq aitqanda iriktelip, rezervke engen jastarmen kezdesýge Aqparat jáne qoǵamdyq damý ministri Aida Balaeva, Tsifrlyq damý, innovatsiialar men aeroǵarysh ónerkásibi ministri Baǵdat Mýsin, Prezident ákimshiligi basshysynyń orynbasary Málik Myrzalin, sondai Prezidenttiń kómekshisi Erlan Qarin shaqyrylǵan. Basqosýdyń basty maqsaty – Prezident Joldaýyn talqylap, aldaǵy ýaqytta Prezidenttik jastar kadrlyq rezervin damytyp, júzege asyrýdy josparlaý.
«Prezident Joldaýynyń biregei sipaty bar. Sebebi ol qazirgi Qazaqstandy júieli túrde transformatsiiadan ótkizýdiń keshendi sharalarynan turady. Álbette ony tiimdi túrde júzege asyrý úshin memleket pen qoǵam birlese eńbek etýi kerek. Eń bastysy qoǵamǵa Joldaýdyń negizgi aspektilerin, ony iske asyrýdyń naqty josparly sharalaryn jetkize bilgen abzal. Bul baǵytta Joldaýdy túsindirý jumystary qyzý júrgizilip jatqanyn atap ótý kerek», - dedi Aida Balaeva jastarmen kezdesýi barysynda.
Ministrdiń aitýynsha, ár adamnyń osy keshendi sharalarǵa atsalysýy – Joldaýdy júzege asyrýdyń barynsha sáttiligin kórsetedi.
«10 kúnniń ishinde Joldaýdaǵy talqylaýǵa qatysty qanshama kezdesý men basqosý ótti. Respýblikalyq jáne aimaqtyq buqaralyq aqparat quraldarynda 5 myńǵa tarta material jariialandy. Sarapshylar Joldaýdyń kóp bóligi buǵan deiingi azamattardyń ótinimderin eskergenin kórsetetinin aitady. Iaǵni bul degenimiz «Halyq únine qulaq asatyn memleket» tujyrymdamasynyń jumys istep turǵanyn kórsetedi. Demek qoǵammen ózara tyǵyz qarym-qatynas bar. Memleket halyqtyń únine qulaq asyp otyr. Joldaýdyń 11 baǵyty da qoǵamnyń suranysyna jaýap beredi», - dedi ol.
