Aqparat jáne qoǵamdyq damý ministri Aida Balaeva qazaqstandyq jankúierlerden Olimpiada oiyndaryna qatysqan sportshylardyń buǵan deiingi jetistikterin baǵalaýǵa shaqyrdy.
Onyń aitýynsha, qazir Tokio olimpiadasyndaǵy keibir sportshynyń sátsizdigine kópshilik jaǵymsyz pikir jazyp, tym ádiletsiz syn aityp jatyr.
"Onyń ishinde buǵan deiingi jarystarda elimizdiń atyn tórtkúl dúniege tanytyp júrgen tanymal atletterimizdiń de aty atalýda. 2016 jyly Rio Olimpiadasynda Vasilii Levittiń ringtegi ónerine búkil elimiz tamsandy, oǵan kórsetilgen ádiletsizdikke birge jany aýyrdy. Osy joly Vasilii jeńildi, biraq onyń osy bes jyl ishinde elimiz úshin daiyndalyp, kezekti olimpiadalyq tsiklden ótip, ringke qaita shyǵýynyń ózi qurmetteýge turarlyq sheshim dep sanaimyn", - dep jazdy Balaeva.
Sondai-aq ministr Tokio olimpiadasynan keiin sporttaǵy karerasyn aiaqtaǵan Olga Rypakova keleshekte shákirt tárbieleitinine senim bildirdi.
"Olga Rypakovanyń da sátsizdigi men onyń kásibi karerasy aiaqtaldy degen aqparat kóńilge tipti qaiaý túsiredi. Olga - búkil sanaly ǵumyryn otandyq sport jolyna arnap, elimizdiń atyn talai márte dúbirli dodalarda asqaqtatqan birden bir jeńil atlet", - dedi ministr.
Sondyqtan qandai jaǵdaida da uly sportshylarymyzdyń jetistigi men jeńisin eshqashan umytpaýymyz kerek. Qiyn sátterde qoldaý kórsetý arqyly ǵana biz olarǵa senim uialatyp, keler kúnderdiń jeńisterinen úmit ete alamyz, dep túiindedi ministr.
Aita ketetini, Japoniiada Rypakova úsh attap sekirýden finalǵa shyǵa almady. Bul -qazaqstandyq sportshy medalsyz qaitqan jalǵyz Olimpiada. Ol 2008 jyly Beijińde ótken Olimpiadada tórtinshi oryndy ielendi. Alaida onyń básekelesteri doping qabyldaǵany anyqtalǵannan keiin Olgaǵa kúmis medal tabystaldy. 2012 jyly Londondaǵy Olimpiada oiyndary kezinde Rypakova chempion atanyp, 2016 jyly Rio-de-Janeirodan qola júldemen qaitty.
Rio Olimpiadasynda kúmis júldeni jeńip alǵan Vasilii Levit Tokio Olimpiadasynda nokaýtqa tústi.
