Mádeniet jáne aqparat ministri Aida Balaeva sońǵy kúnderi Quryltai depýtattaryna qatysty, onyń ishinde turǵyn úi máselesi tóńireginde taraǵan alypqashpa áńgimeler men orynsyz aiyptaýlarǵa qatysty málimdeme jasady. Vedomstvo basshysy bul jaǵdaidyń sońy áleýmettik jelidegi býllingke ulasyp bara jatqanyna alańdaýshylyq bildirdi, dep habarlaidy ult.kz.
Ministrdiń resmi habarlamasyndaǵy negizgi túiinder:
Turǵyn úi berý tártibi: Memleket basshysy mádeniet jáne media salasy qyzmetkerleriniń baspana máselesin júieli túrde sheship keledi. Alǵashqy jyldary páterler redaktsiialar usynǵan tizim boiynsha úlestirilse, qazirgi tańda qoldanystaǵy qaǵidalarǵa sáikes — menshiginde jyljymaityn múlki joq qyzmetkerlerge ǵana beriledi.
Túsindirý jumystary: Túsinbeýshilikke jol bermeý úshin memlekettik organ ókilderi men Quryltai depýtattary BAQ-ty qyzyqtyrǵan suraqtarǵa múmkindiginshe ashyq ári jedel túsinikteme berýi tiis.
Jýrnalistik ádep jáne Zań talaptary: Aida Balaeva BAQ ókilderin kásibi ádep normalaryn saqtaýǵa shaqyrdy. Jeke basqa tiisý, aila-sharǵy jasaý jáne arzan sensatsiia qýyp arandatý kásibi jýrnalistiń bolmysyna jat. Sonymen qatar «Mass-media týraly» Zańnyń 26-babyna sáikes, ádep normalaryn saqtaý — jýrnalistiń tikelei mindeti ekenin eske saldy.
Ministr sóz sońynda barsha BAQ ókilderin ózara syilastyqqa, is-sharalar reglamenti men akkreditteý qaǵidalaryn qatań saqtaýǵa shaqyrdy. Ádep normalary buzylǵan jaǵdaida tiisti sharalar kózdelgenin de atap ótti.
