Aqparat jáne qoǵamdyq damý ministri Aida Balaeva Memleket basshysy Qasym-Jomart Toqaevtyń Qazaqstan halqyna kezekti Joldaýy týraly pikir bildirdi, dep habarlaidy "Ult aqparat".
«Táýelsizdigimiz alǵash jariialanǵannan bastap elimizdegi ishki saiasi turaqtylyq men etnosaralyq tatýlyq qaǵidalary bizdiń memlekettik saiasattyń basty ustanymy bolyp keledi. Osynyń arqasynda egemen elimiz osy 30 jyldaǵy jahandyq damýda jotaly jetistikter men bederli biikterdi turaqty baǵyndyryp keledi. Degenmen, jetistikke jetý bar da, ony sol deńgeide ustap turý bar. Bul tek bilik pen halyq arasynda saýatty da syndarly bailanys ornata alǵan qoǵamda ǵana bul múmkin bolady. Sondyqtan da memleket áleýmetpen aradaǵy osy dialogty saqtap qana qoimai, ózara senim deńgeiin túsirmei ony ary qarai nyǵaita jetildirý úshin únemi qajetti sharalardy qabyldap keledi. Onyń jarqyn bir mysaly – qurylǵannan beri is-áreketimen senim údesinen shyǵa bilgen Prezident janyndaǵy Ulttyq qoǵamdyq kelisim keńesi.
Búgingi kúni bul tek konsýltativti Keńes resýrsy ǵana emes, mol intelektýaldy múmkindigi bar tiimdi ári áleýetti qurylym. Memleket Basshysynyń aldyńǵy Joldaýlarynda aitylǵan reformalardy nátijeli de tolyqqandy iske asýyna tyń serpin beretin kúshke ainaldy.
Prezident búgingi halyqqa arnaǵan úshinshi Joldaýynda da elimizde júrgizilip jatqan saiasi jańǵyrý reformalaryn júieli jalǵastyrýdyń mańyzdylyǵyna erekshe mán berdi. Bul rette, el Basshysynyń Ulttyq Keńes minberinde kótergen bastamalary negizinde sátti iske asqan saiasi reformalar paketin atap ótýge bolady. Sonyń nátijesinde, qoǵamda qordalanǵan kóptegen mańyzdy qoǵamdyq-saiasi jáne áleýmettik-quqyqtyq máseleler óz sheshimin tapty.
Mysaly, aýdandyq deńgeilegi qalalar men aýyl ákimderin sailaý reformasy sonyń aiqyn da jarqyn dáleli bola alady. Elimizdiń 14 óńirinde qurylǵan 1 847 sailaý ýchaskelerinde ótken atalǵan sailaýda 2 297 úmitkerdiń ishinen el turǵyndary 730 jergilikti ákimderdi sailap aldy. Sonyń ishinde, olardyń 627-si «Aýyl», «Aq jol», HKP, ADAL syndy saiasi partiialar usynǵan úmitkerlerden tańdaldy. Munyń ózi, Memleket Basshysynyń bastamasymen qolǵa alynǵan reformalardyń saiasi partiialar men azamattyq qoǵam alańyndaǵy belsendilikti odan ary jandandyrýǵa tyń serpin bergenin kórsetedi.
Sondyqtan da Prezident bul baǵytta qolǵa alynǵan sharalardyń durystyǵyna kezekti ret toqtalyp, 2024 jyly turǵyndarǵa aýdan ákimderin sailaýǵa múmkindik beriletinin atap ótti.
Munymen qatar, Memleket Basshysy, jergilikti ózin-ózi basqarýdy jetildirý isinde aýyldyq jerlerdegi azamattyq bastamalarǵa qoldaý kórsetýdiń mańyzdylyǵyna nazar aýdaryp, granttyq qarjylandyrý júiesin beiimdeýdiń tiimdi tetigin ázirleýdi tapsyrdy. Sóz joq, atalǵan sharalardyń barlyǵy da saiasi saýatty, demokratiialyq túsinigi pisip-jetilgen, áleýmettik belsendiligi joǵary azamattyq qoǵam qurý jolyndaǵy qarymdy da aryndy qadam dep bilemin» - dep jazdy ministr áleýmettik jelidegi paraqshasynda.
