Memlekettik organdar «Halyqtyń únine qulaq asatyn memleket» talaptaryna sai bolýy tiis. Memleket basshysynyń kómekshisi - QR Prezidenti Ákimshiliginiń Ótinishterdi qaraýdy baqylaý bóliminiń meńgerýshisi Aida Balaeva osylai dedi, dep habarlaidy QazAqparat.
«Bizdiń búgingi mindetimiz - turǵyndarmen tiimdi ári ornyqty keri bailanysty ornatý. Memlekettik organdardyń mindeti - «Halyqtyń únine qulaq asatyn memleket» talaptaryna sai bolý, kelip túsken árbir ótinishti jiti pysyqtaý, memlekettik organdar júrgizip jatqan baǵdarlamalar men saiasat týraly aqparatty uǵynyqty tilmen túsindirý. Ótinish berýshilerge berilgen sapasyz jaýaptar – ótinishti qaraýdan bas tartý, ony bir memlekettik organnan ekinshi organǵa jibere salý - saiyp kelgende, halyqtyń bilikke degen senimin tómendetedi. Biz mundai tájiribeden múlde aýlaq bolýymyz kerek», - dedi Aida Balaeva elordada ótken «Halyqtyń únine qulaq asatyn memleket - turaqty qoǵam» atty seminar-keńeste.
Prezident kómekshisiniń aitýynsha, ol úshin ótinishtermen jumys júrgizý isin qaita qaraý kerek.
«Birinshiden, memlekettik organdardyń jumysynyń sapasyn arttyrý úshin biz ótinishterdiń 90 paiyzyn Prezident Ákimshiliginiń baqylaýyna aldyq. Bul jumysty uiymdastyrý aiasynda Bólim memlekettik organdardyń jaýaptary men ótinish berýshilerdiń pikirleriniń taldaýy men sapasyna erekshe nazar aýdarady. Tipti teris jaýaptyń ózi, meniń oiymsha, azamattyń kúmánin seiiltý úshin negizdi túrde jetkizilýi kerek. Bólimde qurylǵan jobalyq keńse aiasynda tiisti memlekettik organdar deńgeiindegi júielik problemalardy anyqtaý maqsatynda ótinishterge taldaý júrgizilip jatyr», - dedi ol.
Sonymen qatar, Aida Balaeva azamattardyń árbir memlekettik organ boiynsha ótinishin jeke qaraýǵa shaqyrdy.
«Biz oisyz nemese orynsyz berilgen jaýaptardyń barlyǵyn ortalyq jáne jergilikti atqarýshy organdardyń ózine qaitaryp jatyrmyz. Osylaisha, ártúrli memlekettik organ qyzmetkerleriniń biliktilik deńgeii de anyqtalady. Eger bir suraq kelse, jaýap dalaǵa laǵyp ketpeýi kerek. Birinshiden, memlekettik organdar bir-birin tyńdai bilýi tiis. Bir-birimizdi estigen boida adamdardyń úni de qulaǵymyzǵa jetedi. Ótinishterdi qaraý kezinde artyq biýrokratiialyq kedergiler men rásimderdi joiý, vedomstvoaralyq yntymaqtastyqtyń tikelei arnalaryn qurý jáne atqarýshy tártiptiń sapasyn qamtamasyz etýdiń mańyzy zor. Qazir Úkimet, ministrlikter, barlyq memlekettik organdar, onyń ishinde aýyldyq, aýdandyq deńgeilerge deiin azamattardyń suraǵyna tikelei jaýap beretin adamdar anyqtaldy. Biz ózara tyǵyz qarym-qatynasta bolýymyz kerek. Árbir úndeý tiimdi qaralýy tiis», - dedi Prezident kómekshisi.
