QR Prezidenti Ákimshiligi Ishki saiasat bóliminiń meńgerýshisi Aida Balaeva VIII Azamattyq forýmynda biyl qoǵamda dúmpý týǵyzǵan oqiǵalardy qalai qabyldaǵany týraly aitty, dep habarlaidy Baq.kz agenttigi.
Astanada ótin jatqan forým barysynda «Men senemin» taqyrybynda ótken sessiiada belgili telejúrgizýshi Dana Nurjigit Aida Balaevamen suhbattasty.
Aida Balaeva jyldar boiy áleýmettiń ótkir máselelerin sheshýde kórsetken qoldaýlary úshin azamattyq sektorǵa alǵysyn aitty. Telejúrgizshi Dana Nurjigit osy jyly elimizde bolǵan, kóptiń kóńilin túsirgen, qabyrǵasyn qaiystyrǵan jaǵdailardy qalai qabyldaǵanyn surady.
«Denis Ten men Abai aýdanyndaǵy balanyń zorlaný jaǵdaiyn eń aldymen, adam, ana retinde qabyldadym. Árbir ata-ana eń aldymen balasynyń qamyn oilap, onyń qiyndyq kórgenin qalamaidy. Denis Tenniń qazasyn aýyr qabyldadym. Ol óte tárbieli, aqjarqyn ári meiirimdi jigit bolatyn. Biz onymen birge «Denis jáne dostary» atty muz aidynyndaǵy shoýyn ázirlegen edik. Men úshin bul qaiǵyly oqiǵa boldy. Ol kezde men demalysta edim. Qyzym ekeýmiz eki-úsh kún boiy jyladyq. Sebebi, ómirge qushtar jigittiń videosy men pikirin jylamai qaraý múmkin emes edi», - dedi Aida Balaeva.
Aida Balaeva sonymen qatar, Abai aýdanyndaǵy jaǵdaiǵa qatysty da pikir bildirdi.
«Biz kúndelikti tirlikte bári de durys shyǵar dep júremiz. Biraq, mundai jaǵdailar ókinishke qarai bolyp jatady. Osy rette uiymdar men qoǵamdyq kóshbasshylar bul jaǵdaidy baqylaýǵa alyp, qoldan kelgenniń bárin jasady. Qazirgi tańda kináliler jaýapkershilikten jaltaryp ketken joq. Bul jaǵdaidan sabaq alýdyń mańyzy zor, sebebi júieli túrde júrgiziletin jumys mundai jaǵdailardyń aldyn alýy kerek. Bul - aýyr sabaq, biraq ary qarai ómir súrýge týra keledi», - dedi ol.
Aida Balaeva sonymen birge, óz sózinde quqyq qorǵaý organdaryn reformalaý boiynsha jumys bastalyp ketkenin tilge tiek etti.
«Jýyrda Memleket basshysy óz Joldaýynda ol týraly aitqan bolatyn. Zorlyq-zombylyq jaǵdailaryn anyqtaý komissiiasynyń jumysy boiynsha reglamentti ózgertý kerek. Sebebi, jynystyq zorlyq-zombylyq qana emes, fizikalyq jáne psihologiialyq, otbasyndaǵy zorlyq-zombylyq jaǵdailaryn da anyqtaý mańyzdy. Balalarmen tikelei jumys júrgizetin bizdiń psihologtardyń kásibiligi men biliktiligine basa nazar aýdarý qajet», - deidi ol.
Ol Kókjailaýdaǵy máselege qatysty eki taraptyń ustanymyna qatysty pikir bildirgisi kelmeitinin atap ótti.
«Kókjailaý jobasy iske asa ma, joq pa – naqty sheshim joq. Jobalyq-smetalyq qujattama men tehnikalyq-ekonomikalyq negizdemesi tek 2020 jyly ǵana aiaqtalady. Taǵy da aita ketkim keledi, naqty sheshim bolmaǵandyqtan, naqty tujyrym jasaýdyń keregi joq degen oidamyn», - dedi Balaeva.
