Foto: Mádeniet jáne aqparat ministrligi
Almatyda «Aiboz» ulttyq ádebi syilyǵynyń jeńimpazdaryn marapattaý rásimi ótti. Qazaqstan Respýblikasy Mádeniet jáne aqparat ministrligi uiymdastyrǵan baiqaý biyl úshinshi ret ótkizildi, dep habarlaidy Ult.kz.
Laýreattardy quttyqtaǵan Mádeniet jáne aqparat ministri Aida Balaeva qazaq ádebietiniń damýyna qosqan úlesteri úshin jazýshylarǵa rizashylyǵyn bildirdi.
"«Aiboz» ádebi syilyǵy – sóz óneriniń maitalmandaryn dáripteitin, olardyń shyǵarmashylyǵyn elge tanytatyn erekshe syilyq", – dedi ministr.
Foto: Mádeniet jáne aqparat ministrligi
Sondai-aq, ol memleket tarapynan rýhaniiat salasyna erekshe mán berilip, udaiy qoldaý kórsetilip jatqanyn atap ótti.
"Jyl saiyn Jazýshylar odaǵy Almaty qalasy ákimdigimen birlesip almatylyq 400 qalamgerge, Astana qalasy ákimdigimen birlesip astanalyq 80 qalamgerge qala ákimderiniń granttary tabystalýda. Ministrlik kitap salasynda da júieli jumysty jalǵastyryp keledi. Máselen, biyl qoǵamdyq mańyzy bar ádebietterdi satyp alý baǵdarlamasyna boiynsha 52 avtorǵa qalamaqy tólendi. Jańa kitaptar aldaǵy jyly kópshilik oqyrmanǵa jol tartady. Al qaita basyp shyǵarý baǵdarlamasy boiynsha 2023 jyl 134 kitap jaryq kórse, biyl jyl sońyna deiin 189 jańa kitap el kitaphanalaryna taratylmaq", – dedi Aida Balaeva.
Foto: Mádeniet jáne aqparat ministrligi
Biyl ministrlik Qazaqstan Jazýshylar odaǵymen «Strategiialyq áriptestik» ornatý boiynsha úsh jańa jobany júzge asyrdy:
Jas qalamgerler «Qazaqstannyń ádebi-tanymdyq panoramasy» jobasy negizinde elimizdiń óńirlerine baryp, jańa shyǵarmalar jazdy. Jyl sońyna deiin qazaq ádebietine jiyrma jańa týyndy qosylyp, ár jas qalamger 4 mln teńge kóleminde qalamaqy alady;
Jas qalamgerlerge arnalǵan «Jazýshylardyń sheberlik mektebi» uiymdastyrylyp, otandyq jáne sheteldik bedeldi qalamgerlerdiń dáristeri men sheberlik synyptary ótti;
«TMD elderiniń arhivterindegi qazaqstandyq jazýshylardyń zertteý jumystary» jobasy uiymdastyryldy.
2024 jyly Iliias Jansúgirov, Beiimbet Mailin, Sáken Seifýllin, Ábish Kekilbaev, Fariza Ońǵarsynova, Gerold Belger sekildi birqatar qalamgerlerdiń mereitoilyq datalary keń kólemde atap ótildi.
Sonymen qatar, Memleket basshysynyń tapsyrmasymen Qazaqstanda jańa mereke – 23 sáýir Ulttyq kitap kúni belgilendi. Osyǵan orai ministrlik «Ulttyq kitap» baiqaýyn jariialady.
Ministr ádebiet salasyn qoldaýǵa arnalǵan birqatar mańyzdy bastamalarǵa nazar aýdardy. «Aiboz» syilyǵynan bólek, jas qalamgerlerge arnalǵan Prezidenttik arnaýly ádebi syilyq, Mádenietaralyq jáne etnosaralyq birlikti nyǵaitýǵa arnalǵan ádebiet salasyndaǵy syilyq, «Daryn» sekildi birqatar sylyqtar men baiqaýlar uiymdastyrylyp keledi.
Foto: Mádeniet jáne aqparat ministrligi
Biyl Mádeniet jáne aqparat ministrliginiń janynan jas jazýshylarǵa arnalǵan «Alqa» ádebi klýby quryldy. Jas jazýshylar Iliias Jansúgirovtyń 130 jyldyǵy jáne Berdibek Soqpaqbaevtyń 100 jyldyǵyna arnalǵan ádebi týr ótkizdi.
"Memleket basshysy 2025 jyldy «Jumysshy mamandyqtary jyly» dep jariialaǵany belgili. Osy oraida, daryndy avtorlarǵa qoldaý kórsetip, qoǵamdaǵy eńbek mamandyqtarynyń mańyzyn ashý maqsattynda jas qalamgerlerge arnalǵan «Erlik pen eńbek dastany» baiqaýy jariialanǵanyn da aita ketkim keledi. Munyń bári ult ádebietin, qalamgerler qaýymyn qoldaýǵa baǵyttalǵan keshendi jumystardyń aiqyn kórinisi dep bilemiz", – dep túiindedi Aida Balaeva.
2024 jyly «Aiboz» syilyǵyna 7 nominatsiia boiynsha 176 shyǵarma avtorlary ótinim berdi: «Úzdik proza» – 57, «Úzdik poeziia» – 37, «Úzdik dramatýrgiia» – 16, «Úzdik ádebi syn» – 13, «Úzdik ádebi aýdarma» – 14, «Úzdik balalar ádebieti» – 31 jáne «Úzdik komiks» – 8 ótinim.
Jasyryn daýys berý nátijesi boiynsha, táýelsiz qazylar alqasynyń sheshimimen «Mahambettiń ólim jazasy» romanynyń avtory Beket Qarashin «Úzdik proza» nominatsiiasynyń jeńimpazy atandy, «Úzdik poeziia» nominatsiiasynda – «Aikórkem» balladasynyń avtory Maraltai Raiymbekuly jeńimpaz boldy. «Úzdik dramatýrgiia» nominatsiiasynda eń kóp daýys Dýman Ramazannyń «Áziret Sultan» pesasyna berildi. «Úzdik ádebi aýdarma» nominatsiiasy boiynsha Raýza Musabaeva «Tań juldyzy» jumysymen jeńimpaz atandy.
«Úzdik balalar ádebieti» nominatsiiasynda Tóken Áljanteginiń «Qyzyqtyń bári aýylda» shyǵarmasy úzdik dep tanyldy. Al «Úzdik ádebi syn» nominatsiiasynda Júsipbek Qorǵasbektiń «Saitannyń oiyny» eńbegi marapatqa ie boldy. «Úzdik komiks» avtory bolyp Jaqsylyq Sabitov «Joshy han» jumysymen tanyldy.
Ulttyq ádebi syilyqtyń jalpy júlde qory 35 million teńgeni qurady.
«Aiboz» – Qazaqstan Respýblikasy Mádeniet jáne aqparat ministrligi qurǵan ulttyq ádebi syilyq, ol otandyq jazýshylardy qoldaý jáne yntalandyrý maqsatynda beriledi.
