Jer telimderine qatysty sot isteri Almatynyń investitsiialyq tartymdylyǵyn tómendetedi. Bul týraly Almatyny damytý jónindegi keńeste QR Prezidentiniń kómekshisi — QR Prezidenti Ákimshiliginiń Ótinishterdi qaraýdy baqylaý bóliminiń meńgerýshisi Aida Balaeva málim etti, dep habarlaidy QazAqparat tilshisi.
«Almaty – ol árbir qazaqstandyq úshin erekshe qala, iaǵni azamattyq bastamalardyń ári jarqyn, kreativti adamdardyń shahary. Almatylyqtar dástúrli túrde ótinimderdiń jalpy statistikasynda eń belsendilerdiń biri. Jyl basynan beri elimiz boiynsha tirkelgen 19 myń ótinimniń arasynda Almatynyń úlesine árbir besinshisi nemese 4 myńǵa jýyǵy tiesili. Olardyń qurylymy da basqa qalalarǵa qaraǵanda ózgeshe. Elimizdiń basqa óńirlerindegi siiaqty ótinimderdiń basym bóligi sot sheshimderine kóńil tolmaýyna qatysty, sondai-aq áleýmettik qoldaý máselesine, úlestik qurylys jáne ózge de problemalarǵa bailanysty», - dedi A. Balaeva.
Onyń sózine qaraǵanda, shaǵymdardyń birazy kásipkerlik pen jer qatynastary máselesin qamtyp otyr. Sonymen birge, onyń kóbisi túrli sot instantsiialarynyń qaraýynda turǵan kórinedi. Bul óz kezeginde qalanyń investitsiialyq tartymdylyǵyna teris áser etedi. Sondyqtan da Almaty ákimdigine bul salany erekshe baqylaýǵa alǵany jón.
Budan bólek, Prezident kómekshisi almatylyqtar jii kóteretin basqa da taqyryptarǵa jekelei toqtaldy. Osy oraida qaladaǵy jáne onyń mańyndaǵy ekologiialyq jaǵdai erekshe nazarda tur.
Munymen qosa, turǵyndardy meditsinalyq qyzmet kórsetýdiń sapasy alańdatady, iaǵni emhanalardaǵy uzyn-sonar kezek pen meditsinalyq infraqurylymnyń qoljetimdigi máselesi bar. Bul turǵyda meditsinalyq qyzmet sapasy barlyq talaptarǵa sáikes bolýy kerektigi aityldy.
Sonymen qatar, A. Balaeva qoǵamdyq kólik júrgizýshileriniń tártibi, aýany lastaityn avtomashinalardy paidalaný problemalaryn sheshý kerektigin atap ótti.
Keńes barysynda qaladaǵy kriminogendik jaǵdaiǵa nazar aýdarý máselesi qozǵaldy.
A. Balaeva qala aýmaǵynda qurylys júrgizý kezinde týyndaityn problemalarǵa jeke toqtaldy. Bul turǵyda qalalyq orta sapasynyń nasharlaýyna alyp keletin keleńsiz jaǵdailarǵa jol bermeý kerektigi máselesi kóterildi.
Prezident kómekshisi shahardaǵy jarnamalardy ilý kezinde memlekettik tildegi mátinderdiń saýatty jazylýy taqyrybyna ekpin qoidy. Sebebi mátindegi qatelikter, aýdarmanyń durys bolmaýy sekildi jaǵdailar kezdesýde.
Balaeva qala aýmaǵynyń keńeiýine bailanysty problemalarǵa da toqtaldy. Birqatar azamattar oblystyq baǵynysta bolǵan kezinde alynǵan ózderiniń jer telimderin rásimdeýmen qiyndyqtarǵa tap bolýda. Qalaǵa qosylǵan aýmaqtar damý men abattandyrý jaǵynan qalys qalyp jatyr. Bul jerlerde káriz júiesi jumys istemeidi, al keibir jerlerde sý qubyry men jol sapasy tiisti deńgeide emes. Qala aýmaǵyn keńeitý kezinde oryn alǵan esepsizdik saldarynan, qalalyq qyzmetter jańa aýmaqtarǵa tiisti deńgeide qyzmet kórsetpeýde.
Prezident kómekshisi osyndai problemalardy Almaty biligi ortalyq memlekettik organdarmen ózara is-qimyl arqyly belsendi túrde sheshýi kerektigin atap ótti.
Aita keteiik, búgin QR Prezidenti Qasym-Jomart Toqaev Almaty qalasyn damytý máseleleri jóninde keńes ótkizdi.
