Aqparat jáne qoǵamdyq damý ministri Aida Balaeva Almaty qalalyq qoǵamdyq keńes múshelerimen kezdesti, dep habarlaidy QazAqparat.
Kezdesý barysynda «Qoǵamdyq keńester týraly» zań jobasyna engizilgen ózgerister talqylandy.
«Jyl basynda Memleket basshysy atalǵan zańǵa qol qoidy. Qoǵamdyq keńesterdiń ókilettigi keńeidi. Osy zań qabyldanǵan ýaqyttan beri qoǵamdyq keńesterdiń jumysynda aitarlyqtai ózgerister boldy. Ózderińizge málim, Memleket basshysy Qasym-Jomart Toqaev biylǵy Qazaqstan halqyna Joldaýynda azamattyq qoǵamdy damytý máselesine airyqsha toqtaldy. Atap aitqanda, jergilikti ózin-ózi basqarý júiesin odan ári jańǵyrtýdyń mańyzdy faktory – azamattyq mádenietti damytý ekenin atady. Dialog pen azamattyq qatysý dástúrin damytý, yntymaqtastyǵymyz ben birligimizge negiz bolatyn ozyq qundylyqtardy dáripteý - biz úshin mańyzdy. Árine, bul iste bizge táýelsiz institýt retinde qalyptasqan qoǵamdyq keńesterdiń qoldaýy qajet»,- dedi minstr.
Sondai -aq, Aida Balaeva qoǵamdyq keńesterdiń qyzmetin jetildirý men úilestirý boiynsha ministrlik tarapynan júrgizilip jatqan jumystardy aitty.
Qoǵamdyq keńes múshelerimen birge zańǵa táýeldi aktiler ázirlendi: Qoǵamdyq keńes týraly úlgi ereje, Qoǵamdyq baqylaýdy uiymdastyrý men júrgizý erejesi, Qoǵamdyq keńester quramy boiynsha usynymdar.
Bul normativtik aktiler túgel máslihattarǵa, ákimdikterge jáne tikelei qoǵamdyq keńesterge jiberildi.
Zańnamanyń negizgi erejelerin túsindirý úshin birqatar ádistemelik oqytý seminarlary ótkizildi.
Kvazimemlekettik sektordyń 12 sýbektisinde qoǵamdyq keńes quryldy. «Samuryq Qazyna» qorynyń qoǵamdyq keńesi qazir qurylyp jatyr.
«Búgingi tańda Qazaqstanda 249 qoǵamdyq keńes bar, onyń 33-i - respýblikalyq, 216-sy - jergilikti deńgeide. Ministrlik «Rýhani jańǵyrý» áleýmettik damý institýtymen jáne sarapshylar qaýymdastyǵymen birge qoǵamdyq keńes týraly Ulttyq baiandama ázirlep jatyr. Keshe ǵana, 30 qyrkúiekte, atalǵan jobanyń saraptamalyq talqylaýy ótti. Sonymen qatar, qoǵamdyq keńesterdiń turǵyndarmen keri bailanys mehanizmderin kúsheitý úshin «KAZKENES» aqparattyq portalyn tanymal etý boiynsha jumys júrgizilýde. Ol arqyly azamattar elimizdiń barlyq aimaqtaryndaǵy qoǵamdyq keńesterge júgine alady «, - dedi ol.
Eske salaiyq, biylǵy 3 qańtarda Memleket basshysy «Qazaqstan Respýblikasynyń keibir zańnamalyq aktilerine qoǵamdyq keńesterdiń qyzmeti máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy.
