Úkimettiń is-qimyl josparynyń negizgi erejelerin Parlamenttiń, óńirlerdiń, ekonomika salalary men qoǵam ókilderiniń qatysýymen talqylaý qajet. Bul týraly Parlament Senatynyń tóraǵasy Dariǵa Nazarbaeva málim etti, dep habarlaidy QazAqparat.
«Negizgi basymdyqtardy Qasym-Jomart Kemeluly Toqaev óz Málimdemesinde anyq aiqyndap berdi. Úkimetke jáne Ulttyq bankke neǵurlym kóp zardap shekken salalardy qoldaýdy qamtityn Ekonomikalyq ósimdi qalpyna keltirý boiynsha keshendi jospardy 11 mamyrǵa deiin daiyndaý tapsyryldy. Búgingi jaǵdaida, ekonomikanyń barlyq salalary men halyq memlekettiń qoldaýyna muqtaj. Álemdik ekonomikadaǵy keleńsiz ahýal men resýrstardyń shekteýli bolýyn eskeretin bolsaq, ártúrli stsenariiler men boljamdardy qarastyryp, naqty múmkindikter men rezervterge baǵa berýimiz qajet», - dedi D. Nazarbaeva Senattyń jalpy otyrysynda.
Onyń paiymynsha, Úkimettiń is-qimyl josparynyń negizi erejelerin Parlamenttiń, óńirlerdiń, ekonomika salalary men qoǵam ókilderiniń qatysýymen talqylaý qajet. Bul talqylaýsyz qabyldanǵan qujat bolmaýy kerek. Bul máseleler búkil qoǵamdy tolǵandyrady.
«Agroónerkásip keshenin damytý strategiiasyna erekshe kóńil bólý qajet. Atap aitqanda, jer jyrtyp, mal ósirip otyrǵan iri, orta jáne shaǵyn biznes azyq-túlik qaýipsizdigin qamtamasyz etip keledi. Jyl basynda ótken parlamenttik tyńdaýda agroónerkásip sektoryna jasalǵan taldaý osy salada problemanyń kóp ekenin kórsetti. Burynǵy problemalarǵa endi tótenshe jaǵdai kezindegiler qosyldy. Bul Agroónerkásip keshenin damytýdyń memlekettik baǵdarlamasyn qaita qaraý kerek ekenine taǵy da kózimizdi jetkizip otyr. Osy aýyl sharýashylyǵy men himiia, jeńil ónerkásipten bastap saýdaǵa deiingi oǵan qatysty indýstriialar, el ekonomikasyn qalpyna keltirip, ósýge negiz bolýǵa qabiletti», - dedi Senat tóraǵasy.
«Búkil álem kóptegen elderde ashtyqtyń oryn alý yqtimaldyǵy joǵary ekenin talqylap jatqanda, biz jinalǵan ónimdermen ne isterimizdi bilmei otyrmyz. Bul jaǵdaidy máslihattar men tekserý komissiialary qatań baqylaýǵa alý qajet dep esepteimin. Máslihat depýtattaryna ótinish – barlyq memlekettik jáne jeke saqtaý oryndary men qoimalarynyń tolymdylyǵyna inventarizatsiia júrgizý qajet. Áleýmettik kásipkerlik korporatsiia arqyly bos alańdardy jalǵa alyp, erte pisetin kókónisterdi sol jerge jinap, keiin saýda núktelerine taratýǵa bolady», - dep atap ótti D. Nazarbaeva.
Senat tóraǵasynyń aitýynsha, oblystar boiynsha astyq ónimderi men ony satyp alý baǵasynyń boljamdaryn taǵy bir ret baǵalaý qajet. Bul máselemen dál qazir ainalysý kerek, óitkeni, astyq jinaityn kezde buǵan ýaqyt bolmaidy.
«Fermerlerdiń eńbegin zaia ketirýge bizdiń quqyǵymyz joq. Olarǵa memlekettiń kómegi qajet, ony osy aidyń tájiribesi kórsetti. Kómekti ishki naryq qajettiligine, sondai-aq qaita óńdeý men eksport múmkindikterine qarai kórsetý kerek», - dedi Dariǵa Nazarbaeva.
