Agroónerkásiptik mamandyqtary boiynsha bilim berý granttarynyń kólemin qalyptastyrý fýnktsiialary Aýyl sharýashylyǵy ministrligine berilmek. Bul týraly atalǵan ministrliktiń basshysy Saparhan Omarov málim etti, dep habarlaidy QazAqparat.
Aita keteiik, búgin QR Parlamenti Senatynyń jalpy otyrysynda «Qazaqstan Respýblikasynyń keibir zańnamalyq aktilerine agroónerkásiptik keshendi retteý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Agrarlyq ǵylymdy damytýǵa toqtalsaq, kásipkerlerdi innovatsiiany engizýge tartý úshin zań jobasymen biznestiń ǵylymi zertteýlerdi qarjylandyrý boiynsha shyǵyndarynyń bir bóligin sýbsidiialaý kózdeledi. Bul biznes pen ǵylymnyń ózara is-qimyl jasaý tetigin iske qosýǵa, agroónerkásiptik keshenge innovatsiiany engizý aýqymyn keńeitýge múmkindik beredi», - dedi ministr.
Onyń sózine qaraǵada, zań jobasy aiasynda Bilim jáne ǵylym ministrliginiń aýyl sharýashylyǵy mamandyqtary boiynsha bilim berý granttarynyń kólemin qalyptastyrý fýnktsiialaryn Aýyl sharýashylyǵy ministrligine berý kózdeledi.
«Sonymen qatar, agrarlyq joǵary oqý oryndarynyń túlekteri úshin aýyldyq jerlerde mindetti túrde jumyspen óteý talaby engiziledi», - dedi Saparhan Omarov.
