Osyǵan deiin munai urlyǵy isi boiynsha 12 kúdiktini qamaýǵa alý týraly sheshim shyǵarǵan Aqtóbe qalalyq №2 sotynyń ókilderi "Aǵaiyndy tórteý" uiymdasqan qylmystyq tobynyń Erkin Izbasardyń jetekshiligimen "qara altyndy" qalai urlaǵany jaily málimet taratty, - dep habarlaidy "Diapazon".
Tergeýdiń málimetinshe, qylmystyq toptyń músheleriniń biri - 30 jastaǵy Nurbolat Qaiyrbekov ótken jyldan biylǵy sáýir aiyna deiin aýyldastary Aqsaqovty, Miralindi, Sarambetovty, Chikovty munai ónimderin sáikes qujatsyz zańsyz túrde tasymaldaýǵa qoldanǵan.
"Qylmystyq toptyń árbir múshesin Muhamediianov, Sársenov jáne Izbasar baqylap otyrǵan. Barlyq másele Izbasarmen jeke kezdesýde sheshilgen, bul kezdesýler telefon arqyly shartty túrde kelisilip otyrǵan. Izbasardyń qurǵan qylmystyq tobynyń turaqty ári uzaqmerzimdi bailanysy bolǵan. Olarǵa Muhamediianov, Sársenov jáne Izbasar baqylaý júrgizgen", - dep jazady basylym.
"Izbasardyń, Muhamediianovtyń, Sársenovtiń jáne Qaiyrbaevtyń qylmystyq is-áreketteri memlekettik organdarda munai ónimderin iri kólemde saqtaýǵa ruqsat beretin múmkindigi bar "Avtodor MK" JShS, "Asad Pliýs" jáne "Tranzit" janarmai quiý beketiniń tirkelýine múmkinshilik jasaǵan.
Sýdia uiymdasqan qylmystyq toptyń árbir múshesiniń róli qandai bolǵanyn aityp berdi: "Sársenov pen Qaiyrbaev Izbasardyń basshylyǵymen munai ónimderin zańsyz satýmen ainalysqan. Izbasar olarmen tasymaldaýǵa kólikti qamtamasyz etken. Munai ónimderin tieý, jetkizý jáne "Tranzit" janarmai beketine quiýdy baqylaǵan, júrgizýshiler Miralin, Aqsaqov, Chikov jáne Sarambetovterdiń jumysyn baqylaǵan, óz kezeginde olar tiisti jerge munaidy jetkizip otyrǵan. Muhamediianov pen belgisizder munai ónimderin satý oryndaryn izdestirip, munai ónimderin zańsyz qamtamasyz etip otyrǵan".
Sonymen qatar, tergeýdiń málimetinshe, Miralin, Aqsaqov, Chikov jáne Sarambetov munai ónimderin kelisilgen jerlerge úzdiksiz jetkizip otyrǵan. Munai satýdan túsken qarajattyń bir bóligin uiymdasqan qylmystyq top músheleri arasynda úlestirilgen, al ekinshi bóligi zańsyz munai ónimderiniń jańa partiiasy satyp alýǵa jumsalǵan. Izbasar aqshanyń úlestirilýine jeke ózi baqylaý jasaǵan.
Sondai-aq, is materialdaryna qaraǵanda, Erkin Izbasar Aqtóbede Muhamediianov pen Sársenov arqyly Qaiyrbaevqa munai ónimderin rezervýar arqyly tieý, jetkizý boiynsha naqty tapsyrmalar bergen, uiymdasqan toptyń jumysyn baqylaǵan. Jumystyń tártibi bylai bolǵan: Izbasardyń tapsyrmasymen Sársenov, Qaiyrbaev jáne belgisizder munai ónimderin zańsyz satyp alyp, olardy "Tranzit" janarmai quiý beketiniń rezervýary arqyly tasymaldaǵan, sol jaqtan reseilikterge satqan.
"Biyl 1 sáýirde Muhamediianov pen Sársenov reseiliktermen 97 myń litr munai ónimin satýǵa kelisken, kelisim jalǵan qujatpen rásimdelgen. 2 sáýirde túnde avtotsisterna Aqtóbeden Orsk qalasyna qarai shyqqan. Kelesi kúni olardy politseiler ustap alǵan. Olardan tabylǵan munai ónimderiniń baǵasy 14 million 550 myń teńge bolǵan", - delingen habarlamada.
Sýdia qylmystyq toptyń keibir músheleri áli ustalmaǵanyn habarlady.
Al KTK telearnasynyń tilshilerine Aqtóbede Erkin Izbasardyń anasy ulynyń munai urlamaq túgili, biletke aqsha tappai qinalyp ómir súrgenin aitty.
Sonymen qatar, tilshilerdiń málimetinshe, Aqtóbede munai urlyǵymen ainalysqan qylmystyq top músheleriniń arasynda kúsh qurylymdarynyń ókilderi bolǵan. Úsh kúnnen beri qamaýǵa sanktsiia berip jatqan sot muny rastaǵanymen, naqty kimder ekenin ashyp aitpai otyr. Osy ýaqytqa deiin 12 kúdikti qamaýǵa alyndy. Aralarynda topty basqardy degen aiyp taǵylǵan atyshýly Erkin Izbasar da bar. Biraq advokaty men týystary onyń múgedektigin aityp, sot sanktsiiasyna narazylyq bildirýde.
Qamaýǵa alynǵandardyń arasynda"Aǵaiyndy tórte" degen laqap atpen tanymal uiymnyń serkesi - atyshýly Erkin Izbasar da bar. Al onyń quqyǵyn tanymaldyǵy odan kem emes - advokat Serik Sársenov qorǵap júr. Ol kezinde Arqankergende sarbazdardy qyryp tastaǵan Vladislav Chelahtyń isimen tanylǵan edi. Bul joly qorǵaýshysyn aqtap alatyndyǵyna senimdi. Eń aldymen qamaýǵa alý týraly sanktsiianyń kúshin joiýǵa kirispekshi. Óitkeni arbaǵa tańylǵan, ári búireginen airylǵan múgedekke abaqtyda esh jaǵdai jasalmaǵanyn aitady.
"Birinshi toptaǵy, júre almaityn múgedek óz jaǵdaiyn abaqtyda jasai almaidy ǵoi. Onymen qosa búireginiń joqtyǵynan únemi dárigerdiń baqylaýynda bolýy kerek. Sot ony qashyp ketedi dep qamaýǵa aldy.Sonda, arbada otyrǵan oǵan qanat bitip ushyp kete me?", - deidi advokat Serik Sársenov.
Erkin Izbasardyń anasy ulynyń qylmysqa qatysy baryn estigende talyp qala jazdapty. Onyń kóldeneń tapqan tabysyn kórmedik dep tipti tań qalyp otyr. Óitkeni, kúresten Almatyda ótetin chempionatqa barýǵa qoradaǵy eki jylqysyn satyp, jolaqysyn taýyp berip edik degendi aitady.
Erkin Izbasardyń anasy Meiramhan Izbasarova. © KTK
"Ushaqqa minýge aqshasy bolǵan joq. Eki atyn soidyryp mashinamen ketti. Bul sheksiz, shetsiz jala. Balam munaidy túsinde de kórgen joq", - dedi E.Izbasardyń anasy Meiramhan Izbasarova.
Degenmen, Ulttyq qaýipsizdik komitetindegiler munai urlyǵyna qatysty topty dál osy Erkin Izbasardyń basqarǵanyna senimdi. Ári bul aram iske radikal salafit toptardyń da qatysy bar kórinedi. Al ázirshe qamaýǵa alynǵan 12 kúdiktiniń arasynan Izbasardyń jaqyndary ǵana sanktsiiaǵa qatysty oblystyq sotqa shaǵym jazypty. Ol apta sońyna taman qaralmaqshy.(Derekkóz: KTK)
