QR Energetika ministri Maǵzum Myrzaǵaliev ortalyq kommýnikatsiialar qyzmetinde ótken brifingte AES salynýy yqtimal oryndarǵa sipattama berdi, dep habarlaidy QazAqparat.
«Bul másele 2013 jyldan beri talqylanyp keledi. Segiz jyldan beri osy maqsatta ártúrli jer ýchaskeleri olardyń seismikalyq ahýalyna, jeliler siiaqty infraqurylymnyń bolýyna jáne árine, tutynýǵa negizdele otyryp zerdelendi. Al, qazir eki oryn bar. Biz olar týraly birneshe ret aittyq, bir lokatsiia - Balqashtyń janyndaǵy Úlken eldi mekeni bolsa, ekinshisi - Kýrchatov qalasy», - dedi Maǵzum Myrzaǵaliev jýrnalisterdiń suraǵyna bergen jaýabynda.
Energetika ministriniń aitýynsha, atalǵan lokatsiialar seismikalyq qaýipsizdigi boiynsha iriktelip otyr.
«Úlken lokatsiiasy infraqurylymnyń bolýy turǵysynan qaraǵanda, qyzyqtyraq, basymyraq kórinedi. Óitkeni ol jerden kerneýi 500 kilovolt bolatyn «Soltústik-Ońtústik» elektr tasymaldaý jelisi ótedi. Al Úlken kenti bizdiń negizgi energiia tutynýshylarymyz – ońtústik óńirlerge jaqyn. Biraq oryndy tańdaý týraly túpkilikti sheshim áli qabyldanbaǵanyn atap ótken jón. Dese de, bul jumys bastalyp ketti. «Samuryq-Qazyna» qory tiisti zertteýler men esep júrgizý úshin jobalyq top uiymdastyrdy», - dedi vedomstvo basshysy.
Ministr, sondai-aq, AES qyzmetinen paida bolatyn óndiris qaldyqtaryn saqtaý ornyn tańdaý máselesine túsinikteme berdi.
«Bul da - tiisti jobalyq toptyń aldynda turǵan mindetterdiń biri. Iaǵni, ol jerde biz tek ýchaskeni ǵana emes, tehnologiialardy da anyqtaýymyz kerek. Qýatyn anyqtaýymyz kerek, sodan keiin saqtaý máselesin sheshýimiz kerek. Ázirge qaldyqtar úshin naqty oryn joq», - dedi Maǵzum Myrzaǵaliev.
