Parlament Májilisi men Senatynyń depýtattary «Qazaqstan Respýblikasynyń keibir zańnamalyq aktilerine advokattyq qyzmet jáne zań kómegi máseleleri boiynsha ózgerister men tolyqtyrýlar engizý týraly» zań jobasyn Kelisý komissiiasynda qaita qaraidy, dep habarlaidy QazAqparat.
Aita keteiik, biyl naýryz aiynyń basynda senatorlar buryn Májilis bekitken zań jobasyn áriptesterine qaita qaraýǵa qaitarǵan edi.
«Zańnama jáne sot-quqyqtyq reforma komiteti «Qazaqstan Respýblikasynyń keibir zańnamalyq aktilerine advokattyq qyzmet jáne zań kómegi máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańynyń jobasyna Qazaqstan Respýblikasy Parlamentiniń Senaty engizgen ózgerister men tolyqtyrýlaryn qarap shyqty. Senat pozitsiialarynyń kópshiligi zań jobasynyń normalaryn naqtylaýǵa baǵyttalǵandyqtan, Komitet olarmen kelisýge bolady dep esepteidi. Sonyń ishinde, qylmystyq protsesti júrgizetin organnyń advokattardyń kásibi uiymy nemese onyń qurylymdyq bólimsheleri arqyly qorǵaýshy taǵaiyndaý boiynsha sharalardy qabyldaýy týraly qoldanystaǵy normalardy saqtaý usynylǵan. Advokat sottylyǵynyń quqyqtyq saldaryna qatysty normanyń qoldanystaǵy redaktsiiasyn qalpyna keltirý usynylady, ol sottylyqty ótegen nemese alyp tastaǵan sátten bastap advokat mamandyǵyna oralýǵa múmkindik beredi», - dedi Májilis depýtaty Snejanna Imasheva.
Sonymen qatar ol Respýblikalyq advokattar alqasy men Respýblikalyq zań konsýltanttary alqasynyń jalpy qajettilikterine árbir advokat pen zań konsýltanty úshin keminde 1 ailyq eseptik kórsetkish mólsherinde ai saiynǵy jarnalardy tóleý týraly normalardyń qoldanylý merzimin 2026 jylǵa deiin shekteý usynylyp otyrǵanyn aitty. Kórsetilgen merzim ótkennen keiin ai saiynǵy jarnalardyń mólsheri men aýdarý tártibin advokattar men zań konsýltanttary derbes belgileitin bolady.
Onyń aitýynsha, budan basqa, advokattar men zań konsýltanttarynyń keibir sanattaryna, onyń ishinde aýyldyq jerlerde jumys istep júrgenderge múshelik jarnalardy tóleýge jeńildikter belgileý usynylǵan. Ádilet organdarynan shyǵarylǵan, sondai-aq memlekettik organdardyń zań mamandyǵy boiynsha keminde on jyl jumys istegen qyzmetkerlerdi zań konsýltanty retinde attestattaýdan ótkizýden bosatý jónindegi normany alyp tastaý kózdelgen.
«Sonymen qatar, Komitet Senattyń salystyrma kestesiniń 4-pozitsiiasy, iaǵni Respýblikalyq zań konsýltanttary alqasyn qurýǵa qatysty túzetýdi kelisý komissiiasynyń talqylaýyna shyǵarýdy usynady. Kelisý komissiiasynyń quramyna depýtattar A.Qojahmetov, S.Imasheva jáne A.Platonovty usynamyz», - dedi Snejanna Imasheva.
Jalpy otyrys barysynda depýtattar Májilistiń Zańnama jáne sot-quqyqtyq reforma komitetiniń Kelisý komissiiasy boiynsha usynysyn maquldady.
Budan buryn habarlanǵandai, ótken aptada Májilistiń Zańnama jáne sot-quqyqtyq reforma komitetiniń tóraǵasy Qanat Mýsin týraly Facebook-tegi paraqshasynda tiisti zań jobasy qaita qaralatanyn jazdy.
