T.Júrgenov atyndaǵy Qazaq ulttyq óner akademiiasynyń stýdenti Ádilhan Makin «Slavian bazary-2019» halyqaralyq festivalinde Gran-prige ie boldy. Bul týraly akademiia rektory Ashat Maemirov Vitebskiden málim etti, dep habarlaidy "Ult aqparat".
A.Maemirov Facebook-tegi paraqshasynda resmi habarlaǵanyndai, Ádilhan Makin estrada óneri fakýltetiniń 4 kýrsynda oqidy.
- Elimizdiń kók bairaǵyn jelbiretip, mereiimizdi tasytqan óner jeńisi qutty bolsyn! – deidi Ashat Maemirov.
Osydan dál tórt jyl buryn «Slavian bazary-2015» halyqaralyq festivalinde Dimash Qudaibergen tuńǵysh ret Gran-pridi jeńip alsa, 2017 jyly Ernar Sadyrbai birinshi júldege ie bolǵan edi.
Vitebskide Dimash Qudaibergen baǵyndyrǵan biik biyl Ádilxan Makinniń jeńisimen jańǵyrdy. Eki kún boiy erekshe talanty men vokaldyq múmkindikteri úilesip, kásibi oryndaýshylyq deńgeii men akterlik sheberligi jarasym tapqan Ádilxan Makin - qazylar alqasy men alty myńnan astam kórermenniń, onyń syrtynda tikelei efirdi tamashalaǵan milliondaǵan festival jankúierleriniń tańdaiyn qaqtyryp, ystyq yqylasyna bólendi.
Memleket basshysy Qasym-Jomart Toqaevtyń uly aqyn Abai atamyzdyń 175 jyldyǵyna arnalǵan óleń oqý estafetasy týraly kórermenderge qazaq tilinde xabarlap, «Slavian bazary» festivaliniń úlken saxnasynda Abaidyń «Kózimniń qarasy» ánin arnaiy shyrqady.
Ádilxan ekinshi týrda da úmitkerlerdiń kóshin bastap, qorytyndysynda 178 upai jinap, qatarlastarynan oq boiy ozyp, sýyrylyp alǵa shyqty.
Belarýs, Resei, Germaniia, Shveitsariia, Bolgariia, Malta, Izrail, Qytai, Latviia, Ýkraina, Polsha, Litva, Grýziia, Armeniia, Moldova sekildi memleketterdiń aitýly estrada ánshileriniń arasynan top jarýy elimizdegi óner men mádeniet salasyndaǵy kásibi úrdistiń biik deńgeide ekendigin kórsetedi.
QR Mádeniet jáne sport ministrliginiń qoldaýymen Vitebskige barǵan shyǵarmashylyq delegatsiia úsh kún boiy festival jumysy men konferntsiiaǵa belsene aralasyp, Qazaqstandaǵy óner keńistiginiń jetistikterimen, tájiribelerimen oi bólisti.
«Slavian bazary» xalyqaralyq festivaliniń resmi ókili Qarlyǵash Ábdikárimovanyń tynymsyz eńbegine, Ádilxannyń vokaldan ustazy, PhD doktory Ioanis Kaisidige jáne osy óner saparyna erekshe qoldaý jasap, ár kún saiyn kásibi keńes-tilekterimen qanattandyryp otyrǵan QR Mádeniet jáne sport ministri Aqtoty Raiymqulovaǵa alǵys aitamyz. Qazaqstannyń án ónerindegi jańa da jarqyn esim Ádilxan Makin el rýxaniiatyn álem keńistikte dáripteý jolynda biik belesterdi baǵyndyra bergei», dep jazdy A.Maemirov.
