Balalardyń ákesi aliment tólemese, bul alimentti nemerelerine ata-ájesinen óndirip alý usynysy talqylanyp jatyr. Bul týraly QR Ádilet ministri Marat Beketaev málim etti, – dep habarlaidy "Ult aqparat".
«Osy baǵyttaǵy zertteý jumystary barysynda Italiiada óte qyzyqty tájiribeni kórdik. Bul elde aliment boiynsha boryshker, iaǵni balalardyń ákesi aliment tólemese, onda Italiia sottary ne isteidi? Italiia zańy boiynsha bul qaryzdy boryshkerdiń ata-anasynyń jaýapkershiligine jatqyzýǵa bolady. Iaǵni, sýdia: «eger ata-anasy osyndai jaýapkershiligi tómen jigitti tárbielese, onda olar balasy úshin aliment tóleýi tiis» degen ýájdi aitady. Atap aitqanda, nemereleri ata-ájesi úshin bóten emestigi nazarǵa alynady», - dedi M. Beketaev Parlament Májilisindegi Úkimet saǵatynda.
Osy oraida ministr qazirgi kezde bul tájiribeni jalpy qoǵamda talqylaý bastamasy jasalyp otyrǵandyǵyn atap ótti.
«Bul turǵyda qandai pikir bolatynyn bilgimiz keledi. Keibireýler atalǵan tájiribe durys emestigin alǵa tartýda. Iaǵni, boryshker ózi jaýap berýi tiis, onyń qaryzyn ata-anasy tóleýge mindetti emestigin aitýda. Degenmen de Italiianyń tájiribesi qyzyǵýshylyq týdyrýda. Sondyqtan ony talqylaǵan durys bolady. Meniń oiymsha, tiisti zań jobasyna osy normany engizý kerek», - dedi vedomstvo basshysy.
Sonymen qatar, tilshiler M. Beketaevtan boryshkerdiń ata-anasy zeinetker bolsa, olarǵa bul jaýapkershiliktiń júktelýi múmkindigin surady.
«Zeinetker atasy men ájesinde múlikteri bar, iaǵni olarda páterleri, kólikteri bar. Bul óz kezeginde qaryzdy jabýdyń kózi bola alady. Eger de mektepke barý úshin nemerelerine kiim alýdyń ózi qiyn bolyp jatsa, ne isteý kerek?!», - dedi ministr. Budan buryn habarlanǵandai, Májilistegi Úkimet saǵatynda Marat Beketaev kelip túsken shaǵymdardyń jartysyn osy alimentti óndirip alý kategoriiasy qamtyp otyrǵanyn aitty.
