Elimizdiń ómirinde jańa dáýir bastalyp jatyr. Mundai pikirdi QR Parlamenti Senatynyń depýtaty Nurtóre Júsip bildirdi, dep habarlaidy QazAqparat.
«Qazaq Eli qaterli synaqqa tap bolǵany málim. Memleket basshysy Qasym-Jomart Toqaev terrorlyq agressiiaǵa qarsy tegeýrindi áreket etti. Sonyń arqasynda Eldiń Úmitin jaqty, Senimin ornyqtyrdy. Elimizdiń ómirinde jańa dáýir bastalyp jatyr. Prezident Qasym-Jomart Toqaev búgin jańa Úkimet basshysyn taǵaiyndady, aldaǵy ýaqytta atqarylatyn máselelerdi túgel sanamalap aitty. Shegelep tapsyrmalar berdi. Bul sheshimder elimizdiń damýyna, halqymyzdyń turmysynyń, ál-aýqatynyń odan ary kóterilýine baǵyttalǵan. Halyq muny tolyq qoldaidy. Barshamyz Prezident saiasaty aiasynda birlesip, tas túiin jumylýymyz qajet. Prezident eń ózekti máseleleri ortaǵa saldy. Halyqtyń jaǵdaiyn jaqsartýǵa baǵyttalǵan sharalardy usyndy», - dep atap ótedi ol.
Senator Memleket basshysy birinshi kezekte Táýelsizdikti nyǵaitý, bul úshin áskerdi kúsheitý, bilimdi arttyrý, halyqtyń tabysyn kóterý, óńdeý jáne taý-ken óndirisin, aýyl sharýashylyǵyn damytý, infliatsiiany aýyzdyqtaý, kvazimemlekettik sektordy retteý jáne taǵy basqa salalarǵa qatysty naqty tapsyrma bergendigin basa aitady.
«Qalyptasqan kúrdeli jaǵdaidan shyǵý úshin «Qazaqstan halqyna» áleýmettik-qoǵamdyq qory ashylady. Onyń qarjysy qaterli aýrýǵa shaldyqqandardyń qymbat emine, operatsiiasyna, balalarǵa, buqaralyq sportty damytýǵa arnalǵan keshender salýǵa, qyzmettik boryshyn atqara júrip opat bolǵan quqyq qorǵaý, áskeri, azamattyq qyzmetkerlerdiń otbasyna kómektesýge, zardap shekken aimaqtarǵa kómekke jumsalady. Qarjylandyrý - jeke jáne memlekettik qarjy kózderinen, sheteldik qaiyrylymdylyq qorlarynan bolady. Bailyǵy asyp-tasyǵan oliharhtar jyl saiyn qarjy quiýy kerek. Bul óte ózekti másele. Adam astyń ózin kúshenbei ishedi, kúshenip bosatady», - dedi Nurtóre Júsip.
Depýtat elge eshqandai paidasy joq qorlar men kompaniialar jumysyn qaita qaraý usynylǵanyna, ásirese alpaýyt qorlardyń aty atalyp, túsi tústelgenine nazar aýdartady.
«Samuryq-Qazyna» qoryn reformalaý qajet, jasai almasaq, onyń ekonomikamyzǵa qajeti joq ,- dedi. Qordyń jabyq jumysy, bir kózden satyp alý ótkir synǵa alyndy. «Samuryq-Qazyna» qorynyń satyp alýlaryna qatysty shaǵymdar jii kelip túsedi. Qordyń aktivi jalpy ishki ónimniń 60 paiyzyna jýyǵyn quraidy. Biraq qor ulttyq bailyqty arttyrdy ma? Qordyń úlken jalaqy alatyn basshylary, qyzmetkerleri nemen ainalysady? Kvazimemlekttik sektordy túbegeili ózgertýdi tapsyramyn. Eger ony reformalai almasaq, ondai qordyń bizdiń ekonomikamyzda bolmaǵany durys», - degen Memleket basshysy málimdemesin tarihi sózben túiindedi. «Jańa Qazaqstandy» birge quraiyq!«,- dep túiindedi.Bul jańa ózgeristerdiń bastalatyndyǵyn ańǵartady. Halyqpen ashyq jumys júrgizý qajet. Bul rette memlekettik qyzmetshilerge kóp nárse baidanysty. Halqymyz «Aýrýyn jasyrǵan óledi«,- deidi. Qoǵam ótkennen sabaq alýy, tazarýy, jańarýy tiis. Túiequs sekildi bastaryn qumǵa tyǵyp, eldiń muń-muqtajyna qulaq aspaityn kerdeń kezeńnen tezirek arylyp, qýatty Qazaqstandy birge qurýǵa umtylýymyz qajet», - dep túiindedi sózin Senat depýtaty.
