Ádildikti sheneýnik kabinetinen izdeitin ádetimizden aryla almai kelemiz. Mundai pikirdi Ortalyq kommýnikatsiialar qyzmetindegi baspasóz máslihatynda QR Joǵarǵy sotynyń baspasóz hatshysy Aidos Sádýaqasov bildirdi, dep habarlaidy QazAqparat.
«Sot júiesinde oryn alǵan jańashyldyqtar ózdiginen paida bolǵan joq. Ol - Ult josparynda kózdelgen reformalardyń logikalyq jalǵasy. Kez-kelgen jańashyldyqtyń tabysty júzege asýy reformatorlarǵa ǵana bailanysty emes. Ol eń áýeli qoǵamnyń ózgeristerdi qabyldaý deńgeiine bailanysty. «Sóz túzeldi, tyńdaýshy sen de túzel» demekshi, birqatar zańdardy da ózgerttik. Sot korpýsy birtindep jańarýda. Biraq eger siz ben bizdiń zańǵa degen qurmetimiz ózgermese, munyń bári beker. Reformanyń qiyndyǵy da osynda. Búginde qit etse boldy, joǵary jaqqa, ákimder men ministrlerge, tipti Prezidentke deiin shaǵymdanatyndar kóbeigen zaman. Biraq, ádildikti sottan emes, sheneýniktiń kabinetinen izdeitin sol baiaǵy ádetimizden aryla almai kelemiz», - dedi ol.
Onyń atap ótýinshe, Ata zańymyzǵa sáikes, elimizde sot tóreligin tek sot qana atqarady. Eshqandai organ nemese laýazymdy tulǵa sýdia qyzmetin atqara almaidy. Sot isine qandai da bir aralasý zań boiynsha jaýapkershilikke alyp keledi. Soǵan qaramastan, naqty sot isin jelige jazyp, talqylaý sánge ainalyp barady.
«Biraq áleýmettik jeli tek shyndyqtan turmaidy. Muny sizder jaqsy bilesizder. Munda taza faktiden góri emotsiia basym. Keibireýler ózin sottyń qurbany retinde sipattap, el-jurttyń aianyshyn týdyrady. Mundai jazbalardy oqyǵan adam sot isimen tanyspasa da, sottyń sheshimine qatysty bir jaqty pikir jazyp, syn aitady. Biz, árine, synnan qashpaimyz. Eń bastysy, syn shyn bolýy kerek. Degenmen, Feisbýk pen Instagram esh ýaqytta sot protsesin aýystyra almaidy. Sot sheshimimen kelispegen adam kelesi satyǵa júginýi qajet. Qarap otyrsaq, osynaý qarapaiym qaǵida saqtala bermeidi», - dedi Joǵarǵy sottyń baspasóz hatshysy.
Aita keterligi, baspasóz máslihatynda QR Parlamenti Májilisiniń depýtaty, Zańnama jáne sot-quqyq reformasy komitetiniń múshesi Evgenii Kozlov, Joǵarǵy Sottyń sýdiasy Elena Maksiýta, Joǵary Sot Keńesiniń múshesi Nurjan Joldasbekov zańnyń ústemdigin qamtamasyz etý jáne sýdialardy irikteý júiesin jetildirý taqyrybynda sóz qozǵady.
