London jáne Rio-de-Janeiro Olimpiada oiyndarynyń kúmis júldegeri, Aziada jeńimpazy Ádilbek Niiazymbetov ringtegi karerasyn aiaqtaǵanyn málim etti, dep habarlady Qazaqstan boks federatsiiasy.
Bul jańalyqqa qatysty ulttyq quramanyń bas bapkeri Myrzaǵali Aitjanov óz oiyn aitty.
"Iia, Ádilbek bizben aqyldasqannan keiin osyndai sheshim qabyldady. Ol kóp jyldar boiy Qazaqstan quramasynda óner kórsetti. Jeńisteri de az emes. Qazaqstan jalaýyn kókke kóterdi. Onyń jaraqattary bar, emdeý úshin ýaqyt qajet. Al sportshynyń densaýlyǵy bárinen de joǵary
Ol ár sportshynyń mańdaiyna buiyra bermeitin jeńisterge qol jetkizdi. Olimpiada oiyndary men Álem chempionatynyń finalyna tek myqtylar shyǵady. Sondyqtan otandyq boks aldynda sińirgen eńbegi orasan", — deidi Myrzaǵali Aitjanov.
Ádilbek Niiazymbetov bokstan ulttyq qurama komandanyń kapitany bolyp, bul mindetti de abyroimen atqardy. Qazaqstan birinshiligi aiaqtalǵan soń bapkerler keńesi qurama sapynda óner kórsetetin boksshylarmen birge jańa kapitandy da bekitpek.
