Tanylmal teatr jáne kino akteri Ádil Ahmetov «Nur Otan» partiiasynyń múshesi atandy. Bul týraly búgin Partiia kúnine orai partiia qataryna qabyldaý saltanatynda belgili boldy.
Jalpy búgin elimiz boiynsha 3 myńnan astam qazaqstandyq partiia múshesi atandy. Astana qalasynyń ózinde ár salada eńbek etip júrgen 20 azamatqa partiia bileti saltanatty jaǵdaida tabys etildi. Olardyń qatarynda belgili kino jáne teatr akteri, Qazaqstannyń eńbek sińirgen qairatkeri Ádil Ahmetov, «Liter» respýblikalyq qoǵamdyq-saiasi gazeti bas redaktorynyń orynbasary Jannat Oishybaeva, Qazaqstannyń eńbek sińirgen qairatkeri, belgili telejúrgizýshi Qaragóz Súleimenova, «Habar» agenttigi» aktsionerlik qoǵamy Basqarma tóraǵasynyń birinshi orynbasary Rinat Kertaev siiaqty tanymal azamattar bar.
Partiia qataryna jańadan qabyldanǵan áriptesterin quttyqtaǵan Máýlen Áshimbaev biyl «Nur Otan» partiiasynyń qurylǵanyna 20 jyl tolyp otyrǵanyn aitty. Ol óz sózinde osyndai mereitoi kezinde partiia múshesi atanýdyń ózinde úlken mán bar ekenine nazar aýdardy. Sondai-aq eldiń baǵyndyrǵan biikteri men jetken jetistikterinde barlyq nurotandyqtyń úlesi bar ekenin atap ótti.
– Ótken jyldarda partiia Elbasynyń eń senimdi tiregi jáne elimizdiń jetekshi saiasi kúshi retinde qalyptasyp úlgerdi. Elbasynyń ekonomikany reformalaýǵa, áleýmettik salany damytýǵa, qoǵamdaǵy ózekti máselelerdi oń sheshýge baǵyttalǵan strategiialyq bastamalaryn júzege asyrýǵa belsene qatysty. Sondyqtan elimizdiń barlyq jeńisteri men jetistikterinde «Nur Otan» partiiasynyń, sondai-aq ár nurotandyqtyń úlesi bar, – dedi partiia Tóraǵasynyń Birinshi orynbasary.
Sonymen qatar ol barsha jiynǵa qatysýshylardy Alǵys aitý kúnimen quttyqtady.
– Bul kún eldiń yntymaǵy men birligin odan ári arttyratyn zor mańyzǵa ie. Sondyqtan barsha qazaqstandyqtardy ataýly kúnmen quttyqtap, shynaiy alǵysymdy bildiremin. Árdaiym elimiz aman, jurtymyz tynysh bolsyn, – dedi Máýlen Áshimbaev.
