«Ádebiet portalynyń» mobildi qosymshasy iske qosyldy. Bul týraly portal ókilderi habarlady.
«Ádebiet portaly» internet-jobasynyń mobildik qosymshasy IOS jáne Android platformalarynda ázirlenip, qoldanysqa berildi. Búginnen bastap qosymshany kez kelgen jeli qoldanýshysy App Store nemese Play Market arqyly júktep alyp, qajetine jarata alady. Bul mobildik qosymsha arqyly «Ádebiet portalyndaǵy» ádebi maqalalardy, kitaptardy oqý, aýdiokitaptardy tyńdaý, portaldaǵy onlain túrde ótip jatqan ádebi konkýrstarǵa qatysý burynǵydan da qoljetimdi bolmaq.
Oqyrman mobildik qosymshany óziniń smartfonyna nemese planshetine júktep alyp, saiabaqta da, qoǵamdyq kólikte de, alys jolǵa shyqqanda da, bir sózben aitqanda, kez kelgen jerde oqi alady.
Sonymen qatar, mobildik qosymsha arqyly «Ádebiet portalyna» tirkelý de nedáýir jeńildetilip, ońtailana tústi. Portalǵa tirkelgen oqyrman «Ashyq minber» bóliminde óziniń blogyn ashyp, onda ózi qalaǵan materialdy ornalastyra alady. Ózinde bar elektrondy kitapty júktep, basqa oqyrmandarmen bólisýge de bolady. Portal platformasyndaǵy 4 myńnan astam kitaptyń ishinen ózi tańdaǵan kitapqa belgi qoiý arqyly óz blogyna saqtap, jeke kitaphanasyn da jasaqtai alady.
Jeke kitaphanadaǵy kitaptardyń bir ereksheligi – olardy offlain túrde, iaǵni internet jelisi joq jerde de oqýǵa múmkindik bar. Oqyrman Kez kelgen maqalanyń astyna pikir qaldyryp, basqa oqyrmandarmen oi bólisip, maqalany talqylaýǵa atsalysady. 4 myńǵa jýyq avtordyń ishinen ózine unaityn avtorǵa «Jankúier» bolý arqyly, sol avtordyń paraqshasyn tolyqtyrýǵa qolǵabys etedi.
«Ádebiet portaly» óz oqyrmandaryna mobildyk qosymsha arqyly ádebiet aidynynda erkin júzýge barlyq jaǵdaidy jasaýdy basty maqsaty dep sanaidy. Mobildi qosymshany óz smartfonyńyzǵa júktep alyp, ádebiet áleminiń myń san boiaýly ǵajaiyp ómirine enińiz!
