Búgin Úkimet otyrysynda Aqparat jáne qoǵamdyq damý ministri Aida Balaeva «Ulttyq rýhani jańǵyrý» jobasynyń mindetterin túsindirdi, dep habarlaidy QazAqparat.
«Ulttyq rýhani jańǵyrý» jobasynyń basty maqsaty – ǵasyrlar boiy qalyptasqan Ulttyq kodty saqtap, búgingi tehnologiialyq zamannyń aǵymyna beiimdep, bolashaqtaǵy órkeniettik sananyń negizin bekitý.
«Osy rette, Ulttyq joba negizgi úsh baǵytta júzege asyrylady. Birinshi baǵyt eki negizgi mindetti kózdeidi. Bul – Elbasy men Memleket basshysynyń ideialyq bastamalary negizinde iske asyp jatqan «Rýhani jańǵyrý» baǵdarlamasyna jańa lep berý arqyly ulttyq qundylyqtarymyzdy ilgeriletý jáne memlekettik tildi damytý», - dedi Balaeva.
Atap aitqanda:
- halyq arasynda utymdy salt-dástúr men ádet-ǵuryptardy, eldik tálim-tárbie men rýhani ústemdikti dáripteý jáne qoǵamdyq sananyń mádeni deńgeii men talǵamyn kóterý arqyly órkeniet kóshine ilesetin, básekege qabiletti jańa ult kelbetin jasaý;
- jalpy qoǵamda, sonyń ishinde balalar men jastar arasynda qazaqtildi orta qalyptastyrý arqyly memlekettik tildi – ultaralyq til dárejesine jetkizý.
«Bul mindetterdi oryndaý úshin 2025 jylǵa deiin qarjylyq jaǵynan negizdelip, ózara biriktirilgen 38 aýqymdy is-shara men 8 naqty kórsetkishke jetý josparlanǵan. Ekinshi baǵyt «El Rýhy» degen ataýmen eki úlken mindetten turady. Bul – el ishinde mádeni qyzmetterdiń sapasyn kóterip, halyqqa qoljetimdiligin arttyrý jáne el syrtynda otandyq mádenietti dáriptep, tanymal etý», - dedi ministr.
Osy oraida 2025 jylǵa deiin:
- mádeni infraqurylymdy damytý men shyǵarmashylyq potentsialdy barynsha arttyrý arqyly mádeni qyzmetterdiń elimizdiń shalǵai aýdan-aýyldardaǵy qoljetimdiligin 92,5%-ǵa deiin jetkizý;
- tól mádeniet pen ónerimizdiń jetistikterin álemdik deńgeide ilgeriletý úshin otandyq ónimderdi shyǵarmashylyq jáne tehnologiialyq turǵyda taratýdyń tiimdi júiesin qalyptastyrý.
Bul maqsatta iriktelgen 13 jalpyulttyq is-shara men 5 naqty kórsetkishke jetý josparlanǵan, onyń ishinde 250 jańa mádeni nysan salynyp, 1200 nysan kúrdeli jóndeýden ótetin bolady.
«Úshinshi baǵyt «Táýelsizdik urpaqtary» dep atalady. Ol – jastardyń rýhani kemeldenip, kásibi ósip, qoǵamdyq jetilýin kózdeitin úsh aýqymdy mindetti qamtidy», - dep túsindirdi vedomstvo basshysy.
Sonymen qatar 2025 jylǵa deiin:
- jastardyń bazalyq suranystaryn sheshý, iaǵni, sapaly jáne qoljetimdi bilim berý, jumysqa ornalastyrý jáne turǵyn úimen qamtamasyz etý;
- jastardyń jan-jaqty damýyna quqyqtyq jaǵdailar jasap, rýhani-adamgershilik jáne otbasylyq qundylyqtarǵa baýlý;
- jastardy qoǵamdyq paidaly isterge tartyp, básekege qabiletti adami kapitaldyq resýrsyn ulǵaitý úshin jańa múmkindikter ashý.
Bul baǵytta uzyn sany masshtabty 15 jalpyulttyq is-shara men 8 naqty kórsetkishke jetý josparlanǵan, onyń ishinde NEET sanatyndaǵy jastarmen jumysqa erekshe kóńil bólinedi.
«Ulttyq joba tutastai qoǵamdyq sanany jańǵyrtý aiasynda strategiialyq mindetterdi sheshýde birqatar jalpyulttyq ideologiialyq máselelerge laiyqty jaýap beretin qujat dep esepteimiz», - dedi Aida Balaeva.
