Frantsiia úkimetine keńes beretin densaýlyq saqtaý salasyndaǵy ǵalymdar toby halyqtyń 95%-yn vaktsinalaý kerek ekenin eskertti, dep habarlaidy QazAqparat.
Frantsýz mamandary COVID-19-dyń delta-nusqasynyń taralýyn toqtatý úshin el turǵyndaryna ekpe salý kerek dep sanaidy.
«Delta-nusqamen bailanysty pandemiianyń tórtinshi tolqyny tez taralyp, vaktsinalaýdyń qazirgi joǵary deńgeiine qaramastan, densaýlyq saqtaý júiesine shyǵyn keltirýi múmkin», - dedi ǵylymi keńestiń ókilderi frantsýzdyq BAQ-qa.
«Adamdardyń 90-nan 95 paiyzyna deiin vaktsina almasa nemese infektsiia juqtyrǵan bolmasa, pandemiiany qadaǵalai almai qalamyz», - dep qosty mamandar.
Qazirgi kezde Frantsiia turǵyndarynyń jartysyna jýyǵy vaktsinanyń birinshi dozasyn, 40%-y ekinshi dozasyn alǵan. Respýblika úkimeti osy jyldyń tamyz aiynyń aiaǵyna deiin Frantsiia halqynyń úshten ekisin – 35 mln turǵyndy tolyq qorǵaýdy qamtamasyz etýdi josparlap otyr.
Karantindi jeńildetý boiynsha sharalardan keiin Frantsiiada juqtyrý jaǵdailarynyń ósýimen bailanysty el prezidenti Emmanýel Makron dúisenbi kúni pandemiiamen kúrestiń jańa sharalary týraly habarlaidy dep kútilýde.
Frantsiianyń ǵylymi keńesi alǵash ret Úndistan, Angliia, Shotlandiia, Irlandiia jáne Portýgaliiada anyqtalǵan delta-nusqanyń taralýyn qadaǵalaýdy kúsheitýge shaqyrdy.
