Endi Qazaqstanda qamaýǵa alynǵan kúdiktilerdiń shashy sot sheshimi shyqpaǵanǵa deiin alynbaidy. Bul týraly ishki ister ministri Erlan Turǵymbaev aitty, dep habarlaidy "Ult aqparat".
Vedomstvo basshysynyń aitýynsha, 30 qyrkúiekte ishki ister ministrliginde konsoliým ótip, kúdiktilerdiń shashyn almaý týraly sheshim qabyldanǵan.
"Bizde sanitarlyq epidemiologiialyq normaǵa sáikes, ýaqytsha qamaý izoliatoryna túsken adamnyń shashyn 1,5 santimetrge deiin alyp tastaý týraly buiryq boldy. Men osy buiryqtyń kúshin joiý týraly sheshim qabyldadym. Endi sot sheshim shyǵaryp, adam túzetý mekemesine túspeiinshe, onyń shashyn almaidy", - dedi Turǵymbaev úkimet kýlýarynda.
Buǵan deiin Almatyda Nursultan Kúdebaevtyń qazasyna bailanysty qamaýǵa alynǵan hirýrg Qanat Tezekbaevtyń jubaiy tergeý izoliatorynda kúieýiniń shashyn taqyrlap alyp tastaǵanyn aitqan edi.
Nursultan Kúdebaev – Almaty politsiia departamentiniń basshysy Serik Kúdebaevtyń uly. Biyl tamyzdyń basynda Almaty oblysynda kvadrotsiklmen jol apatyna túsken bolatyn. 27 tamyzda ol Germaniiadaǵy emhanalardyń birinde kóz jumdy.
Osydan keiin Almatydaǵy №4 qalalyq klinikalyq aýrýhananyń bas dárigeri Qanat Tezekbaev pen anesteziolog Asqar Tuńǵyshbaev ustalyp, sot sheshimimen eki aiǵa qamaýǵa alyndy.
Dárigerlerge Qylmystyq kodekstiń 317-baby, 3-bóligi "Meditsinalyq nemese farmatsevtikalyq qyzmetkerdiń kásibi mindetterin tiisti deńgeide oryndamaýy" boiynsha aiyp taǵyldy.
Almatylyq dárigerlerdiń ustalýy meditsina qyzmetkerleriniń narazylyǵyn týǵyzdy. Bul iske Qazaqstan prezidenti Qasym-Jomart Toqaev ta aralasty.
Prezidenttiń málimdemesinen keiin eki dáriger de eshqaida shyqpaý týraly qolhatpen bosap shyqty.
Eger kinási dáleldense, dárigerler úsh jylǵa deiin belgili bir laýazymdardy atqarý nemese belgili bir qyzmetpen ainalysý quqyǵynan aiyrylyp, bes jylǵa deiin sottalýy múmkin.
Ishki ister ministri Erlan Turǵymbaev dárigerlerdiń qamaýǵa alynýyna Almatynyń bas politseii Serik Kúdebaevtyń qatysy joq dep sendirdi.
