Búgin QR Sybailas jemqorlyqqa qarsy is-qimyl agenttiginiń janyndaǵy «Adaldyq alańy» respýblikalyq jobalyq keńsesiniń jetekshisi Tólegen Zineshuly Baiǵulov mezgilsiz ómirden ótti, dep habarlaidy "Ult aqparat".
Tólegen Baiǵulov Sybailas jemqorlyqqa qarsy birinshi mediaortalyqtyń tóraǵasy jáne «Adaldyq alańy» jobalyq keńsesiniń jetekshisi retinde sybailas jemqorlyqqa qarsy saiasatty iske asyrý, memlekettik organdardyń ashyqtyǵyn qamtamasyz etý jáne qoǵamdyq baqylaýdy kúsheitý boiynsha irgeli jumystar atqardy.
Azamattyq ustanymy joǵary qoǵam belsendisi retinde qoǵamdyq-saiasi jumystarǵa belsene qatysyp, eldiń igiligine qyzmet etti.
Sybailas jemqorlyqqa qarsy túrli jobalardy iske qosyp, «Adaldyq alańynyń» jalpyulttyq qozǵalysqa ainalýyna úles qosty.
Ol pandemiia kezindegi qaýip-qaterge qaramastan, tosqaýyl beketterge, aýrýhanalar men dári-dármek qoimalaryna monitoring jasap, qiyn kezeńde halyqpen birge boldy.
Onyń jedel jeli retinde paidalanǵan jeke nómirine 4 500-den asa azamat habarlasyp, zań buzýshylyqtar týraly habarlaǵan.
