Foto: Gov.kz
QR Ulttyq kitaphanasynda kórnekti aqyn, Qazaqstannyń Halyq jazýshysy, qoǵam qairatkeri Ábý Sársenbaevtyń týǵanyna 120 jyl tolýyna orai eske alý keshi ótti, dep habarlaidy Ult.kz.
Ádebi keshke Qazaqstan Jazýshylar odaǵy Basqarma tóraǵasynyń orynbasary Qasymhan Begmanov, qalamger qaýym, ádebiettanýshy ǵalymdar, oqyrmandar men aqynnyń týystary qatysty. Kesh barysynda qonaqtar Ábý Sársenbaevtyń kitaptary qoiylǵan kórmeni tamashalady.
Keshti QR Ulttyq kitaphana direktory Ǵaziza Nurǵalieva ashyp berip, «qazaq ádebietiniń Aivazovskiii» atanǵan aqynnyń shyǵarmashylyǵyna toqtaldy.
Qazaqstan Jazýshylar odaǵy Basqarma tóraǵasynyń orynbasary Qasymhan Begmanov qazaq ádebietiniń iri tulǵasy, teńiz jyrshysy atanǵan, shyǵarmashylyq taǵdyry halqynyń taǵdyrymen órilgen tulǵanyń bolmysyna tereńirek úńildi:
- Bizdiń urpaqtyń baǵy — biz Ábý aǵany kórdik. Ábý aǵa – jai ǵana úlken jazýshy emes, adamgershiliktiń, qarapaiymdylyqtyń, meiirim men parasattyń beinesi edi. Ol kóptegen jas qalamgerge qamqor bolyp, olardyń boiyna senim uialatty, shyǵarmashylyqqa baǵyt-baǵdar berdi. Árqaisysyna óziniń týǵan balasyndai qarap, ómirlik úlgi kórsetti. Ábý Sársenbaevtyń «Tolqynda týǵandar», «Teńiz áýenderi» sekildi romandary Kaspii teńiziniń tolqyndary men teńizshi ómiriniń qily sátterin shynaiy sýrettegen biregei týyndylar. Teńiz tabiǵatyn, balyqshylardyń beineti men erligin, adam men tabiǵattyń máńgi arpalysyn ol shyndyqtyń shyńynan kórsetti. Jazýshynyń ózi de sol teńizdiń uly edi. Jeti jasynda jetim qalyp, on jasynda Kaspiige «qazanshy bala» bolyp attanǵan Ábý aǵa ómirdiń dúlei daýylyn da, tirshiliktiń sýyq tolqynyn da erjúrek júregimen eńserdi. Sondyqtan onyń qalamynan týǵan árbir sýret – teńizdiń óz daýysy, tolqynnyń óz úni ispetti, - dedi Q. Begmanov.
Sonymen qatar, eske alý keshinde aqyn, Halyqaralyq «Alash» ádebi syilyǵynyń laýreaty Jumabai Quliev, ǵalym, filologiia ǵylymdarynyń doktory, professor Zinol-Ǵabden Bisenǵaliev, filologiia ǵylymdarynyń doktory, professor Jumat Tilepov, jazýshylar Zaria Jumanova men Nurlan Qami, aqynnyń jerlesi, filologiia ǵylymdarynyń doktory Sansyzbai Mádiev, aqyn, kompozitor, Qazaqstan Jazýshylar odaǵynyń múshesi, respýblikalyq «Jiger» festivaliniń laýreaty Talap Qarash, aqynnyń týystary Madina Manaeva men Kenishbek Sultanbekov Ábý Sársenbaev týraly estelikterin aityp, ádebi týyndylayr týraly óz kózqarastary men oilaryn ortaǵa saldy.
Buǵan qosa, keshte Ábý Sársenbaev týraly túsirilgen «Tolqynda týǵan abyz aqyn» atty derekti film kórsetilip, Ábý Sársenbaevtyń qyzy Raihan Sársenbaevanyń «Sen qurmette ony» kitabynyń tusaýkeseri ótti.
