9 qańtarda ózin memleket dep jariialap alǵan Abhaziiada jurt jappai narazylyqqa shyǵyp, jańa sailaý ótkizýdi talap etti. Júzdegen adam Sýhým qalasynda Abhaziia prezidenti Raýl Hadjimba ákimshiliginiń ǵimaratyna basyp kirdi. Ǵimarat ishine jinalǵandar «Hadjimba, ostavkaǵa ket!» dep aiǵailady.
Abhaziianyń ishki ister ministriniń birinshi orynbasary Beslan Bagateliia TASS agenttigine «politseilerdiń narazylardy prezident ákimshiligi ǵimaratynan ary yǵystyrǵanyn, ishke kirgender shyǵarylǵanyn» aitqan.
Biraq keiin narazylar ǵimaratqa qaita bet alyp, ishke birinshi qabattaǵy terezeler arqyly kirmek boldy. Kúzet ishke kirip úlgergen birneshe adamdy qaita syrtqa shyǵarmai qoidy.
Abhaziia prezidentiniń ákimshiligi bul narazylyqty «bilikke qarsy tóńkeris jasaýǵa talpynys» dep atady.
«Oqiǵany memlekettik tóńkeriske talpynys dep baǵalaimyz. Bilik respýblikadaǵy jaǵdaidy konstitýtsiialyq tártipke sai qalpyna keltirý úshin qoldan kelgenin bárin jasaidy» dep málimdeme taratty prezident ákimshiligi.
Abhaziiadaǵy «Aitaira» (Qaita jańǵyrý) oppozitsiialyq partiiasy «eldegi jaǵdaidy ýshyqtyrmas úshin» Hadjimbanyń ostavkaǵa ketýin talap etken.
Abhaziianyń qorǵanys ministri Mirab Kimshariia Interfaks agenttigine «Abhaziia áskeri eshqashan óz halqyna qarsy shyqpaidy, saiasi isterge aralaspaidy» dedi.
- Abhaziia – 1993 jyly Grýziiamen soǵystan keiin óz-ózin jariialap alǵan separatistik aimaq. Abhaziianyń bólinýin Resei qoldap kelgen. 2008 jyly bes kúnge sozylǵan Resei-Grýziia soǵysynan keiin Máskeý Abhaziianyń táýelsizdigin moiyndaǵan. Grýziia Abhaziia men Ońtústik Osetiiany Resei basyp alǵan aimaq dep sanaidy jáne Máskeýdi eldiń shekarasyn buzdy dep aiyptaidy. Resei bul aimaqqa jii kómektesip turady. Beiresmi derekterge sai, Máskeý aimaqtaǵy halyqtyń 90 paiyzyna tólqujat bergen.
- 2019 jyldyń tamyzynyń aiaǵy men qyrkúieginiń basynda Abhaziia aimaǵynda sailaý ótti. Ekinshi týrǵa qazirgi prezident Raýl Hadjimba men oppozitsiialyq «Amtsahara» partiiasynyń ókili Alhas Kvitsiniia ótken. Keiin Hadjimba jeńiske jetti dep jariialanǵan. Biraq oppozitsiia Hadjimba jetkilikti daýys almady dep, sailaýdy qaita ótkizýdi talap etedi.
