Foto: Olympik.kz
Halyqaralyq dziýdo federatsiiasy (IJF) Majarstan astanasy Býdapesht qalasynda máresine jetken álem chempionatynan keiin dziýdoshylardyń álemdik reitingin jańartty. Álemdik uiym usynyp otyrǵan reitingke sáikes, úsh otandasymyz óz salmaq dárejelerinde TOP-10 palýannyń qataryna enip otyr, dep habarlaidy Ult.kz.
Máselen, áielder arasyndaǵy básekede otandyq dziýdo tarihynda alǵash ret finalda beldesip, kúmis júldeger atanǵan Ábiba Ábýjaqynova (48 kg) reitingte eki saty joǵarylap, 5662 upaimen 2-orynǵa jaiǵasty.
Erler arasynda Parij Olimpiadasynyń jeńimpazy, álem chempiony Eldos Smetov (9-oryn) biyldyqqa tatamige shyqpasa da, áli de álemniń eń úzdik 10 dziýdoshynyń qatarynda tur. Sondai-aq Parij Olimpiadasynyń qola, álem birinshiliginiń kúmis júldegeri Ǵusman Qyrǵyzbaev álem chempionatyndaǵy nátijesine bailanysty reitingte 7 saty kóterilip, TOP-10 palýannyń qataryna qosyldy.
Budan bólek, 60 kelidegi Maǵjan Shamshadin 19-orynǵa kóterilse, Abylaihan Jubanazar (81 kg) men Nurlyhan Sharhan (100 kg) reitingtegi oryndaryn saqtap qaldy. Abylaihan 14-orynda, Nurlyhan 26-orynda tur. Álem chempionatynda 90 kelide beldesken Meiirlan Maksim birden 36 saty kóterilip, 41-orynǵa joǵarylady. Ol jahandyq dodanyń 1/8 finalynda tórt dúrkin álem chempiony (úsheýi komandalyq saiysta) japoniialyq Goki Tadzimadan jeńilip qalǵan edi.
100 keliden joǵary salmaqta beldesetin Erasyl Qajybaev ta álem chempionatynan keiin jaǵdaiyn jaqsartyp aldy. Reitingte 7 satyǵa joǵarylap, TOP-20 dziýdoshynyń qataryna qosyldy.
