Shyǵys Qazaqstan oblysynda uly Abaidyń 175 jyldyǵyna orai 71 infraqurylymdyq joba júzege asyryldy, dep habarlaidy QazAqparat.
Karantindik shekteýlerge bailanysty hakim mereitoiyna orai óńirde josparlanǵan 560 sharanyń 198-i júzege asyryldy. Onyń ishinde 71 infraqurylymdyq joba máresin jetken. Bul týraly oblys ákimi Danial Ahmetov halyqqa esep berýinde aitty.
Sársen Amanjolov atyndaǵy Shyǵys Qazaqstan ýniversiteti janynda «Abaitaný» ǵylymi-zertteý institýty quryldy. Oblys mektepteriniń 5-8 synyp oqýshylary men kolledj stýdentterine arnalǵan kabinetter ashylyp, elektivti kýrstar engizildi. Sonymen qatar «Abai álemi» kitaptar seriiasy jaryq kórip, oblys teatrlarynda «Abai», «Jas Abai», «Qara sózder», «Abai joly: «Sen óz oilaryńmen bizge uqsaisyń!» spektaklderi qoiyldy.
«Semei qalasynda «Uly aqyn Abai uldarymen» eskertkishiniń saltanatty ashylýy men Memleket basshysynyń abaitanýshylarmen kezdesýi mereitoidyń negizgi oqiǵalary boldy. Barlyq sharalar Abai Qunanbaiulynyń shyǵarmashylyǵyn nasihattaýǵa, onyń ideialaryn qazaqstandyqtardyń jańa býynyna patriottyq tárbie berýde paidalanýǵa, tarihi-mádeni mura eskertkishterin saqtaýǵa, Semei qalasynyń týristik infraqurylymyn jáne Abai aýdanynyń tarihi jerlerin damytýǵa baǵyttaldy», - dedi aimaq basshysy.
Onyń aitýynsha, ǵylymi-zertteý jumystaryna baǵyttalǵan arnaiy baǵdarlama aiasynda belgili arheologtar - Zeinolla Samashev pen Ábdesh Tóleýbaevtyń jetekshiligimen jáne álemniń 20 elinen kelgen ǵalymdardyń qatysýymen aimaqtyń mańyzdy arheologiialyq eskertkishterin zertteý jalǵasýda. Shilikti men Eleke Sazy qorymdarynan «Altyn adam» jáne «Úrjar hanshaiymy» artefaktileri tabylyp, «Uly Dala altyny» arnaiy ekspozitsiiasyna biriktirildi.
«Qazaqstan Respýblikasy Táýelsizdiginiń 30 jyldyǵyn merekeleýdegi basty mindetimiz - belgilengen josparlardy iske asyrý, oblystyń áleýmettik-ekonomikalyq damýynyń oń dinamikasyn qamtamasyz etý, turǵyndardyń ómir súrý sapasyn jaqsartýǵa yqpal etý», - dep qorytyndylady Danial Ahmetov.
