Foto: QR Mádeniet jáne aqparat ministrligi
«Astana Opera» ártisteri Úlken teatrdyń Jańa sahnasynda «Abai» operasyn sahnalady. Qoiylym alys-jaqyn shetelderdiń úzdik operalary keletin «Videt mýzyký» halyqaralyq festivali aiasynda kórsetildi. Gastroldik sapar QR Mádeniet jáne aqparat ministrliginiń, Resei Federatsiiasyndaǵy Qazaqstan Respýblikasy Elshiliginiń jáne Úlken teatr ákimshiliginiń qoldaýymen uiymdastyryldy.
Qoiylymdy tamashalaýǵa QR Mádeniet jáne aqparat ministri Aida Balaeva, RF Prezidentiniń halyqaralyq mádeni yntymaqtastyq jónindegi arnaiy ókili Mihail Shvydkoi, Qazaqstan Respýblikasynyń Resei Federatsiiasyndaǵy Tótenshe jáne Ókiletti Elshisi Dáýren Abaev jáne basqalar qatysty.
«Búgin eki eldiń mádeni ómirindegi tarihi oqiǵanyń kýási bolyp otyrmyz. Sharanyń rýhani jáne estetikalyq mańyzy zor. Ári tereń áleýmettik-gýmanitarlyq máni bar. Óitkeni mádeniettiń halyqtar arasyndaǵy shynaiy, taza jáne máńgilik dostyǵyn saqtap, barlyq kedergilerdi eńsere alatynyn kórip, estip, sezinip otyrmyz», - dedi Aida Balaeva.
Foto: QR Mádeniet jáne aqparat ministrligi
«Abai» qoiylymy QR Memlekettik syilyǵynyń laýreaty, Qazaqstannyń eńbek sińirgen qairatkeri, kórnekti dirijer Alan Bóribaev, rejisser Djankarlo del Monako, stsenograf Etsio Fridjerio, kostiým boiynsha sýretshi, «Oskar» syilyǵynyń laýreaty Franka Skýarchapino syndy tanymal tulǵalardyń arqasynda kórermenge jol tartty.
Bul kólemdi týyndy 70 jyldan astam ýaqyt buryn jazylǵan. Opera alǵash ret 1944 jyly Qazaq ulttyq opera jáne balet teatrynyń sahnasynda qoiyldy. Birneshe ret eń bedeldi halyqaralyq sahnalarda kórsetildi. Máskeýde «Abai» operasy alǵash ret 1958 jyly Qazaq óneri men ádebietiniń onkúndigi aiasynda kórermenge jol tartty. Al búgin Úlken teatr sahnasynda debiýt jasady.
Spektaklge Reseidiń tanymal óner qairatkerleri de qatysty. Ónertaný doktory, Resei Federatsiiasynyń eńbek sińirgen óner qairatkeri, P.I. Chaikovskii atyndaǵy Máskeý memlekettik konservatoriiasynyń professory Nikolai Ivanovich Kýznetsov «Astana Operanyń» Máskeýge shynymen de tamasha spektakl ákelgenin, bul kórermen úshin erekshe tartý bolǵanyn atap ótti.
«Sizder qazaq kompozitorynyń shynymen áserli operasyn, tańǵajaiyp mýzyka jazǵan týyndysyn tańdaǵansyzdar. Kórermender yqylasy erekshe – bári de sondai tebirenip, qyzyǵýshylyqpen tamashalady! Operanyń qazaq tilinde oryndalǵany da – tamasha. Ári, meniń oiymsha, erekshe mańyzdy. Bul shyǵarmany burynnan bilemin. Kóptegen reseilik kórermenge de aýdarmasy jaqsy tanys. Biz qazaq operasyn ózimizge jaqyn dúnie retinde qabyldaimyz. Qoiylym keremet. Sizderdi Máskeýdegi jetistikterińizben shyn júrekten quttyqtaimyn! Bul dástúrdiń jalǵasatynyna, bolashaqta zamanaýi qazaq kompozitorlardyń operalyq shyǵarmalarymen sizderdi taǵy da kóretinimizge senimdimin», - dedi professor.
Foto: QR Mádeniet jáne aqparat ministrligi
Reseilik tanymal opera rejisseri Mihail Pandjavidze «Abai» qoiylymyn buryn da kórgenin aitty.
«Men ony túpnusqada «Astana Operada» kórgenmin. Sol kezde-aq qoiylymnyń aýqymdylyǵy tańǵaldyrdy. Teatr trýppasynyń deńgeii óte joǵary. Ujymmen jumys isteitin kez kelgen dirijer, rejisser nemese sýretshi oǵan tek qyzyǵa qaraidy dep senimdi túrde aita alamyn. Mundai talantty, óz isine adal adamdarmen jumys isteý – zor baqyt. Abai beinesin sahnada somdaý kúrdeli mindet. Sebebi Abai – ǵalamdyq deńgeidegi tulǵa. Onyń óleńderin qaita oqyp, shyǵarmalaryn qaita tyńdaǵan saiyn ondaǵy oilardyń tereńdigine tańǵalamyn. Osynaý «Astana Opera» teatrynyń janyma jaqyn qoiylymyn ózimizdiń súiikti Úlken teatrda kórip otyrǵanyma óte qýanyshtymyn!» - dedi Mihail Pandjavidze.
Muhtar Áýezovtiń librettosyna jazylǵan Ahmet Jubanov pen Latif Hamididiń «Abai» operasy tek mahabbat, jaqsy men jamannyń aiqasyn beinelegen qoiylym ǵana emes, qazaq halqynyń jan dúniesiniń alýandyǵy men tereńdigin kórsetetin aina, kóshpeli ómirdiń biregei salty men filosofiiasyn kórermenge pash etetin týyndy.
Úlken teatr kórermenderi úshin qoiylym qazaq halqynyń san qyrly mádenietin jaqynnan tanýǵa múmkindik bergen jańalyq boldy. «Astana Opera» ártisteri kórermendi joǵary vokaldyq sheberligimen tánti etti.
Foto: QR Mádeniet jáne aqparat ministrligi
