Búgin Taldyqorǵan qalasynda Qazaqstan halqy tilderi kúnine orai dástúrli Abai atyndaǵy kórkemsóz oqý sheberleriniń respýblikalyq baiqaýy ótkizildi, dep habarlaidy "Ult aqparat".
Iliias Jansúgirov atyndaǵy mádeniet saraiynda ótken baiqaýdy Mádeniet jáne sport ministrliginiń Til saiasaty komiteti uiymdastyrdy.
Kórkemsóz oqý sheberleriniń respýblikalyq baiqaýyna elimizdiń oblystary jáne Nur-Sultan, Almaty, Shymkent qalalarynda ótken konkýrstardyń 16 jeńimpazy qatysty.
Ásirese, kórermenderdi oqý sheberligimen tántti etken Aijan Alqabek, Aisana Áshimhan, Mádi Sáýlebek, Erlan Nurlanov, Áliia Bolatova, Erbaq Qurmetjan mátindi mánerine jetkizip kórermen júregine jol saldy. Olar qazaqtyń tól dybystaryn ashyq, naqty mánerli ári áýezdi jetkizdi.
Sahna tórinde Beiimbet Mailinniń, Sáken Seifýllinniń kórkemdigi joǵary prozalyq shyǵarmalarynan úzindi oqyldy.
Sondai-aq Sábit Dónentaevtyń, Iliias Jansúgirovtyń jáne Fariza Ońǵarsynovanyń poeziialyq shyǵarmalarynan oqylǵan jyr desteleri kópshilik iltipatyna ie boldy.
Qazylar alqasynyń tóraǵasy - belgili aqyn, Memlekettik syilyqtyń iegeri Tynyshtyqbek Ábdikákim, ádebiet synshysy Tursynjan Shapai, dástúrli ánshi Erlan Rysqali, teatr, kino jáne dýbliaj akteri Azamat Sharyn, professor, filologiia ǵylymdarynyń doktory Muratbek Imanǵazinov Abai atyndaǵy kórkemsóz oqý sheberleriniń jeńimpazdaryn anyqtady.
Baiqaýdyń bas júldesi Aijan Alqabekke buiyrdy. Al, birinshi júlde Mádi Sáýlebekke, ekinshi Erbaq Qurmetjanǵa, úshinshi júlde ekeý ony Áliia Bolatova men Aisana Áshimhan ózara bólisti. Jeńimpazdary diplomdar jáne baǵaly syilyqtarmen marapattalady.
Aita keterligi, baiqaý – qazaq tiliniń kórkemdik ereksheligin, bai sózdik qoryn nasihattaý, Abai jáne basqa da qazaq ádebieti klassikteriniń shyǵarmalaryn oryndaý arqyly qazaqtyń kórkem ádebietine jastardyń yqylasyn arttyrýdy kózdeidi.
