Ánshi Dimash Qudaibergen Abaidyń 175 jyldyǵyna orai QR Prezidenti Qasym-Jomart Toqaev joldaǵan estafetany qabyl aldy, dep habarlaidy "Ult aqparat".
Ánshi Instagram-daǵy paraqshasynda Abaidyń «Qaqtaǵan aq kúmistei keń mańdaily» atty óleńin oqyǵan videosyn júktedi.
«Qazaqstan Respýblikasynyń Prezidenti Qasym-Jomart Toqaev @tokayev_online aǵamyzdyń maǵan joldaǵan Abai atamyzdyń 175 jyldyǵyna orai Uly aqynnyń óleńderinen úzindi oqý estafetasyn zor qurmetpen qabyl aldym». Atamyzdyń shyǵarmashylyǵyn taǵy bir márte álemge pash etýge óz úlesterin qosý úshin osy estafetany Aqtóbe oblysynyń ákimi Ońdasyn Seiiluly Orazalin aǵama @aktobe_akparat, RF-nyń halyq ártisi Igor Krýtoi @igorkrutoy65 aǵamyzǵa jáne meniń tyńdarmandarym #dears-tarǵa joldaimyn» dep jazdy ánshi postynda.
Aita keteiik, buǵan deiin QR Prezidenti Qasym-Jomart Toqaev 9 jastaǵy mektep oqýshysynyń estafetasyn qabyl alyp, ony bilim jáne ǵylym ministri Ashat Aimaǵambetovke, Mádeniet jáne sport ministri Aqtoty Raiymqulovaǵa jáne búkil álemdi moiyndatqan talantty ánshi Dimash Qudaibergenge joldaǵan edi.
Keshe bilim jáne ǵylym ministri Ashat Aimaǵambetov Abaidyń «Senbe jurtqa, tursa da qansha maqtap» óleńin jatqa oqyp, estafetany elimizdiń bilim jáne ǵylym salasynyń qyzmetkerlerine, ustazdarǵa, JOO rektorlaryna, oqýshylar men stýdentterge joldady.
Sondai-aq, QR Mádeniet jáne sport ministri Aqtoty Raiymqulova Abai Qunanbaiuly óleńinen úzindi oqydy. Ol Abai jyrlaryn jatqa oqý estafetasyn Jazýshylar odaǵynyń tóraǵasy Ulyqbek Esdáýletke jáne Qazaqstannyń Eńbek Eri, olimpiiada chempiony Jaqsylyq Úshkempirovke, sonymen qatar elimizdiń mádeniet, óner, sport qairatkerine joldady.
