Prezident Ákimshiligi basshysynyń birinshi orynbasary Dáýren Abaev «Ashyq dialog» suhbatynyń kezekti sanynda Jambyl oblysynyń ákimi Berdibek Saparbaevtyń sógis alýyna qatysty pikir bildirdi, dep habarlaidy QazAqparat.
«Formaldy turǵydan alsaq, sheneýnikti jańa qyzmetke taǵaiyndaý boiynsha eshqandai problema bolmaǵan shyǵar. Bári zań nusqaǵan jolmen istelgen de bolýy kerek. Biraq memlekettik qyzmet qurǵaq zańǵa ǵana negizdelmeidi. Sonymen qatar onyń mindetine etika, qoǵamǵa qyzmet etý de kiredi. Men qazir qatelesýim múmkin. Esimde bolsa, Qazaqstanda 100 myńǵa jýyq memlekettik qyzmetshi bar. Onyń bárin Prezident qyzmetten bosatyp jatqan joq qoi, oǵan kelisetin shyǵarsyz. Bul - erekshe jaǵdai», - dep túsindirdi Dáýren Abaev.
Onyń paiymynsha, Prezident qabyldaǵan bul sheshimniń resmi jaǵynan bólek, simvoldyq máni bar.
«Bul – bilik pen qoǵamnyń óreskel ister boiynsha yntymaqtasta bola alatynynyń kórinisi. Muny árbir ákim, árbir ministr túsinýi tiis. Bul jumystan bosatylǵan sheneýnik jaman basqarma bastyǵy bolar edi degen sóz emes. Joq. Bul jerde biliktiń bedeli, bilik pen qoǵamdyq senim týraly aitylyp otyrsa kerek. Senim bolmasa, biliktiń jumysy da múmkin emes. Memlekettik apparattyń muny estýi mańyzdy dep oilaimyn» - dep atap ótti Dáýren Abaev.
