QR Prezident Ákimshiligi Basshysynyń birinshi orynbasary Dáýren Abaev Memleket basshysy Qasym-Jomart Toqaevtyń zeinetaqy qoryndaǵy qarajatty paidalanýǵa qatysty shekti mejeni kóterý merzimin 2022 jyldyń 1 sáýirine deiin uzartý týraly sheshimine qatysty pikir bildirdi, dep habarlaidy QazAqparat.
«Memleket basshysy búgingi sheshimimen birneshe máseleni kún tártibinen alyp tastady dep oilaimyn. Meniń oiymsha, endi narazy bolǵandardyń sany áldeqaida az bolatyn shyǵar. Biraq bazalyq ólshemde biz mynany esten shyǵarmaýymyz kerek. 1998 jyly Qazaqstan zeinetaqymen qamtamasyz etýdiń jinaqtyq júiesine kóshken bolatyn. Al jetkiliktik shegi – memleket azamattardyń qarttyq ómirin qamatamsyz ete alý úshin eseptep shyǵarǵan soma. Biz zeinetaqy jinaǵyn áli de tómen shek boiynsha úlestire alamyz. Sol aqshaǵa búgin satyp alǵan baspanasyn erteń qartaiǵanda kúnkóris qamy úshin satatyndai jaǵdai týyndaityn bolsa, olai jalǵastyrýdyń máni bar ma?», - dedi Dáýren Abaev «Ashyq dialog» suhbatynda.
Onyń sózine qaraǵanda jyl basynda qolǵa alynǵan zeinetaqy reformasynyń arqasynda elimizde 600 myń otbasy turǵyn úi jaǵdaiyn jaqsartýǵa múmkindik alǵan.
«Árine, men jinaǵyn endi sheship úlgermeitinderdiń ashýyn túsinem. Biraq ekonomikalyq jaǵdai, ókinishke qarai, qubylyp turady.
Keibir sarapshylar siiaqty reformany bastan-aiaq jaramsyz etip synaý ádiletsiz. Osy kezeńde 600 myń tranzaktsiia maquldanǵan eken. 600 myń otbasy! Bul 2 mln adamnan artyq adam óziniń turǵyn úi jaǵdaiyn jaqsartty degen sóz», - dedi QR Prezident Ákimshiligi Basshysynyń birinshi orynbasary.
Sondai-aq ol zeinetaqy jinaǵyndaǵy aqshany búgin amalyn taýyp almasa, erteń bári bir igiligin kórý múmkin emes dep oilaityndar týraly pikir bildirdi.
«Bul jóninde sarapshylardyń kóbi aita bermeidi. Qazaqstan – búkil álem boiynsha zeinetaqy jinaǵyn infliatsiia táýekelderinen saqtaýǵa kepildik berip otyrǵan jalǵyz memleket. Sondyqtan zeinetaqy jiǵanynan neǵurlym kóp aqsha sheship alǵysy keletinderdiń máselesi qorqynyshta emes, josparlaý kókjieginiń keńdiginde bolsa kerek. Biz búgingi kúnimiz erteń bolatyn dúnieden mańyzdy dep oilap alǵanbyz. Búgin jetkiliktilik shegi kóterilip ketkeninen narazy bolyp júgender, erteń «nege mardymsyz zeinetaqy alamyz» dep shaǵymdanatyny anyq», - dedi Dáýren Abaev.
Eske salaiyq, 2022 jyldyń 1 qańtarynan birjolǵy zeinetaqy tólemin alýdyń jetkiliktilik shegi 1,8 ese kóteriletini málim etilgen bolatyn. QR Eńbek jáne halyqty áleýmettik qorǵaý ministrliginiń baspasóz hatshysy Aleksandr Kononets atalǵan shekti mólsher nelikten arttyrylatynyn túsindirdi.
Keiin zeinetaqy jinaǵyn paidalanýǵa qatysty enpf-otbasy.kz platformasyna úsh kún ishinde ótinishterdiń rekordtyq sany joldanǵany aityldy.
Búgin senator Nurlan Qylyshbaev Premer-Ministr Asqar Maminniń atyna joldaǵan depýtattyq saýalynda zeinetaqy jinaǵyn paidalanýǵa qatysty jetkiliktilik shegin arttyrý máselesin kóterdi. Depýtat Memleket basshysy zeinetaqy esep-shotynan artyq jinaqty alýǵa múmkindik beriletin azamattar sanatyn birtindep ulǵaitýdy tapsyrǵanyn eske saldy. Senator qazirgi tańda jetkiliktilik somalaryn kóterý taqyryby qoǵamda qyzý talqylanyp jatqanyn atap ótti.
