Eldik múdde jolynda tize qosyp qimyldaý - barshamyzdyń qasietti paryzymyz. Bul týraly Jambyl Jabaevtyń 175 jyldyǵyna arnalǵan «Uly dala aqyny» atty halyqaralyq konferentsiiada QR Prezidenti Ákimshiligi Basshysynyń birinshi orynbasary Dáýren Abaev aitty, dep habarlaidy QazAqparat.
«Azamattarǵa, ásirese, óskeleń urpaqqa bilim berý – memlekettiń mańyzdy mindetteriniń biri. Al mádeniet – otbasynda jáne ósken ortada alǵan tárbieden bastalady. Sol úshin qoǵamnyń mádenietti bolýyna memleketpen qatar ár otbasy da jaýapty. Mundai ortaq júkti memleket pen qoǵam tize qosyp, teńdei kóterisýge tiis. Bul iste, ásirese, ziialy qaýymǵa artylar salmaq erekshe. Qai zamanda da eldik máseleniń durys-burysyn el aǵalary baǵdarlap kelgen. Aǵylshyndar Shekspirmen maqtanyp, orystar Pýshkindi pir tutsa, biz de uly tulǵalarymyz ben klassikterimizge súienemiz. Eldik múdde jolynda tize qosyp qimyldaý barshamyzdyń qasietti paryzymyz dep esepteimin», - dedi Prezident Ákimshiligi Basshysynyń birinshi orynbasary.
Ol taiaýda Jazýshylar odaǵynda bolyp, intellegentsiia ókilderimen kezdesýinde óz oilarymen bóliskenin atap ótti.
«Memleket basshysynyń tapsyrmasyna sáikes elimizde qalamgerlerdi, ásirese jas aqyn-jazýshylardy qoldaý isi qarqyndy túrde jalǵasatyn bolady. Ótken jyly ziiatkerlik qoǵamdastyǵynyń birqatar ókili Abai atyndaǵy memlekettik syilyqqa laiyq dep tanyldy. Biyl, Táýelsizdik kúni qarsańynda da kóptegen ádebiet ókilderi memlekettik nagrada alady. Jyl saiyn ádebiet pen mádeniet qairatkerleri prezidenttik stipendiia beriledi», - dedi Dáýren Abaev.
