- Soǵys jáne eńbek ardageri, Shyńǵyrlaý aýdanynyń qurmetti azamaty Andrei Rýd Germaniia elinen soǵys tutqyny retinde ótemaqy aldy, dep habarlaidy QazAqparat.
BQO memlekettik muraǵatynyń direktory Aijan Saýǵabaevanyń aitýynsha, 2015 jyly 21 mamyrda Germaniia Býndestagy (federaldyq jinalysy) burynǵy keńes áskeri tutqyndaryna aqshalai ótemaqy tóleý týraly sheshim qabyldaǵany belgili. Ótemaqy kólemi az emes, 2500 eýrony quraidy. Osyǵan orai BQO memlekettik muraǵaty óńirde turatyn soǵys tutqyndaryn izdestirdi. Muraǵat qujattary zerttelip, elektrondy baza tekserildi. Sonyń nátijesinde soǵys tutqyny bolǵan kózi tiri bir adam tabyldy. Ol - Shyńǵyrlaý aýylynda turatyn Andrei Iosifovich Rýd.
A.I.Rýd Reseidiń Krasnodar ólkesi Eisk qalasynda 1921 jyly 12 qarashada dúniege kelgen. Áskeri qyzmetke 1940 jylǵy tamyzda shaqyrylǵan ol Uly Otan soǵysynyń alǵashqy kúnderinen-aq urysqa kirisedi. 1941 jyldyń maýsymynda bir top qarýlastarymen birge tutqynǵa túsken keńes jaýyngeri azapty az tartpaidy. Tek budan 1945 jylǵy mamyrda jeńis saǵaty soqqan kezde ǵana qutylyp, áskeri qyzmetin jalǵastyryp, 1946 jyly úiine oralady. 1948 jyly Eisk aýyl sharýashylyǵyn mehanikalandyrý tehnikýmyn bitirgen jas maman Qazaqstanǵa joldama alyp, «Shyńǵyrlaý» keńsharyna sheberhana meńgerýshisi bolyp ornalasady. Osylaisha eńbek jolyn bastaǵan ol bas mehanik, bas injener, keiin Fýrmanov (Jalpaqtal), Shyńǵyrlaý aýdandyq aýyl sharýashylyǵy óndiristik basqarmalarynda jáne «Kazselhoztehnika» aýdandyq birlestiginde bas injener qyzmetin atqarady. Alpys segiz jyl boiy Qazaq elinde turyp, aýdannyń qurmetti azamaty atanǵan Andrei Rýd týra 95 jasqa tolar kezde mundai tosyn syiǵa kezigemin dep oilamaǵan shyǵar, sirá.
Oblystyq muraǵat naqty derekterdi jinastyrǵannan keiin qujattardy nemis tarapyna jiberdi. Sonyń nátijesinde qarasha aiynyń basynda Germaniiadan ońdy jaýap kelip, atalǵan kólemdegi aqsha maidangerdiń esepshotyna aýdaryldy.
Jýyrda, 12 qarasha kúni Andrei Rýd óziniń 95 jasyn atap ótti. Ony aýdan ákimi Albert Esáliev bastaǵan meimandar quttyqtap, alǵyshat pen tartý-taralǵy tabys etti. Al ózi siiaqty maidanger, 93 jastaǵy Shyńǵyrlaý aýdanynyń taǵy bir qurmetti azamaty Súieý Yǵylmanov dosynyń 100 jasqa jetýine tilektestigin bildirdi. Ótemaqy da soǵys tutqynynyń qolyna tidi.
«Men Qazaq jerinde baqytty ómir súrip, urpaq ósirip, tamyr jaidym. Endi, mine, táýelsizdigimizdiń 25 jyldyǵyn da toilaǵaly otyrmyn. Budan artyq qandai baqyt kerek! Qazaq halqymen bite qainasyp ketkenim sondai, qazaq ánderin óte jaqsy kóremin. Ásirese, «Qamajaidy» estisem, janym sergip, kóńilim kóterilip qalady. Meniń uzaq jasaýymnyń syry da osyndai shalt-shadyman ortada júrgendigimnen bolar», dedi QazAqparat tilshisine Andrei Rýd.
