Jańa jyldy onkologiialyq ortalyqta qarsy alatyn kishkentai balapandarymyz úshin búgingi kún erekshe tosyn syimen bastaldy.
Qaterli dertke dýshar bolsa da, emdelip shyǵamyz degen sertke berik balalardy «Samuryq-Qazyna» qorynyń ókilderi Astana men Almatyda merekemen quttyqtady.
Bizdiń elde «Úlkendi sen syilasań, kishi seni syilaidy. Kishini sen syilasań kisi seni syilaidy», - deitin keremet sóz bar. Búgingi kezdesýler osy sóz ben túsiniktiń tereńdigin eske túsirdi.
«Samuryq-Qazyna» AQ kompaniialar toby qaiyrymdylyq qyzmetiniń biryńǵai operatory – «Samruk-Kazyna Trust» qorynyń bastamasymen uiymdastyrylǵan sharada Astanadaǵy Ana men bala ulttyq ǵylymi ortalyǵy men Almaty qalasyndaǵy Pediatriia jáne balalar hirýrgiiasy ǵylymi ortalyǵynda ońaltýdan ótip jatqan 310 balaǵa Jańa jyldyq syilyqtar men sertifikattar tartý etildi.
Máselen, búgin Almatydaǵy ortalyqta onkologiialyq aýrýlary bar 155 bala em alyp jatyr. Osy kishkentailarymyzdy enshiles kompaniialar atynan qordyń Qoǵammen bailanys, áleýmettik-eńbek qatynastary jáne eńbekti qorǵaý jónindegi basqarýshy direktory Ǵibrat Aýǵanov Jańa jyldyq sertifikattar tabystap, ata-analarymen tildesti.
«Qazir elimizde meditsina salasy joǵary deńgeide. Myqty qural-jabdyqtar bar. Dárigerlerimiz de óte bilikti. Sondyqtan osy synaqtan tez ótip, ómirlerińizde jarqyn kezeńder mol bolsyn!», - dedi Ǵibrat Aýǵanov.
Dál osy kúni Astana qalasynyń Ana men bala ulttyq ǵylymi ortalyǵy da jańajyldyq kóńil-kúige bólendi. Bul jerde de ońaltýdan ótip jatqan 155 balaǵa da arnaiy sertifikattar syilandy.
Quny 50 000 teńge sertifikattar arqyly ata-analar balalarymen aqyldasyp, ózderi tańdaǵan kez-kelgen syilyqty «Balalar álemi» dúkender jelisinen satyp ala alady.
Sonymen qatar, elordadaǵy psihologiialyq-pedagogikalyq túzetý kabinetinde tárbielenýshi 500 erekshe bala da syilyqsyz qalmady. Olardy tańerteńgilikte kompaniialar tobyndaǵy eńbek ujymdary atynan quttyqtaǵan «Samruk-Kazyna Trust» qorynyń bas direktory Alfiia Adieva jetkinshekterge táttiler jiyntyǵyn úlestirdi.
«Armandar oryndalý kerek. Al biz, eresekter, bul jolda barynsha kúsh salatyn bolamyz. Bári múmkin, tek armandai bilińder. Barshańa myqty densaýlyq pen ǵajaiypqa senim tileimin», - dedi Alfiia Adieva.
Qaiyrymdylyqtyń basym baǵyttary densaýlyq saqtaý, bilim berý, buqaralyq sportty damytý jáne azamattardyń áleýmettik osal toptaryn qoldaýǵa negizdelgen.
